کراچی: حماس ترجمان خالد قدومی نے کراچی میں یحییٰ السنوار کی غائبانہ نماز جنازہ کے موقع پر کہا کہ باطل کا وہم و گمان ہے کہ وہ جیت گئے، یحیٰی السنوار اور تمام شہداء کا خون رنگ لائے گا۔

حماس کے ترجمان خالد قدومی نے کراچی میں یحییٰ السنوار کی غائبانہ نماز جنازہ کے موقع پر شرکاء سے خطاب کرتے ہوئے کہا کہ شہداء کی داستان امن و امان کی امید اور آزادی کے سفر کی شروعات ہے۔

انہوں نے کہا کہ شہید یحییٰ السنوار کی زندگی مشعل راہ ہے، شہید نے قبلہ اول و فلسطین کی آزادی کے لیے اپنی جان قربان کردی، دیار الحق میں شہید ہوکر پیش ہونا سب سے افضل ہے۔

حماس ترجمان نے کہا کہ شیخ السنوار نوجوانوں کے لیے رول ماڈل تھے، انہوں نے آخری دن تک آزادی کے لیے جدوجہد کی جب کہ سیاست اور دین ہی یحییٰ السنوار کا مسلک تھا۔

ان کا مزید کہنا تھا کہ ایمان و کفر کی جنگ جاری ہے، مجرموں نے یحییٰ السنوار کی شہادت پر جشن منارہے ہیں، باطل کا وہم و گمان ہے کہ وہ جیت گئے ہیں لیکن یحیٰی السنوار اور تمام شہداء کا خون رنگ لائے گا۔

خالد قدومی نے بتایا کہ شیخ احمد یاسین کی شہادت کے ایک ماہ بعد ہی مجاہدین نے باطل کے خلاف زبردست معرکہ آرائی کی اور جہنم واصل کیا، سلسلہ فتح جاری ہے اور اس کا انجام قبلہ اول و فلسطین کی آزادی پر ہوگا۔