اسلام آباد: وفاقی وزیر خزانہ محمد اورنگزیب نے کہا ہے کہ سعودی عرب سے پرائیویٹ سیکٹر پاکستان میں سرمایہ کاری کرے گا۔

وزیر خزانہ محمد اورنگزیب نے پاکستان سعودی عرب بزنس فورم سے خطاب کرتے ہوئے کہا کہ سعودی عرب سے سرمایہ کاروں کو پاکستان میں خوش آمدید کہتے ہیں۔

انہوں نے کہا کہ پاکستان میں سرمایہ کاری کے وسیع مواقع موجود ہیں، بزنس کمیونٹی کو ہر طرح سے ان کے کاروبار میں تعاون کی یقین دہانی کروائیں گے۔

محمد اورنگزیب نے کہا کہ حکومت کاوشوں سے معیشت میں استحکام آیا، تمام معاشی اعشاریے بہتر سمت میں گامزن ہیں۔

انہوں نے کہا کہ پاکستان میں مہنگائی کی شرح میں واضح کمی ہوئی، ملک میں مہنگائی کا اعشاریہ سنگل ڈیجٹ پر آگیا ہے، معاشی استحکام کے نتیجے میں پالیسی ریٹ کم ہوا۔

انکا کہنا تھا کہ پاکستانی روپے کی قدر میں استحکام آیا ہے، پاکستان اسٹاک مارکیٹ اس وقت بہترین کارکردگی دکھا رہی ہے،  ملکی زر مبادلہ کے ذخائر میں اضافہ ہوا ہے، پاکستان نے میکرو اکنامک استحکام کیلئے اقدامات کیے، میکرو اکنامک استحکام کے ساتھ اصلاحاتی ایجنڈا نافذ کیا گیا۔

وزیر خزانہ نے کہا کہ فیصلہ کیا ہے بہترین معاشی پالیسی اور اس کے تسلسل کو یقینی بنایا جائے، بہترین معاشی پالیسی کے تسلسل میں کاروبار کیلئے آسانی فراہم کی جائے۔

محمد اورنگزیب نے مزید کہا کہ حکومت بزنس کرنے کی بجائے نجی شعبہ اس کو لیڈ کرے، نجی شعبے کی شراکت داری سے ہی معیشت کو آگے لے جائیں گے، وزیر اعظم شہباز کے معاشی ترقی کے ویژن کو لے کر آگے بڑھ رہے ہیں۔