اسلام آباد: پاکستان تحریک انصاف (پی ٹی آئی) مظاہرین کے تشدد سے متاثرہ پنجاب رینجرز کے جوانوں کے انکشافات سامنے آگئے۔

پی ٹی آئی کے شرپسندوں سے ملک کے محافظ بھی محفوظ نہیں رہے، شر پسندوں نے احتجاج کی آڑ میں رینجرز اہلکاروں پر دھاوا بول دیا۔

پنجاب رینجزز کے اہلکاروں کے مطابق شرپسندوں نے ان پر باقاعدہ حملہ کیا، نائیک محمد سفیر نے بتایا کہ میں 26 نمبر ڈیوٹی پر تھا جب مظاہرین نے ہم پر تشدد کیا، مظاہرین نے لاٹھی چارج کیا، پتھر مارے، ہم سے ہیلمٹ اور شیٹ بھی چھین لی، ڈنڈے مار کر میرے ناک کی ہڈی اور ٹانگ کو توڑ ڈالا۔

پنجاب رینجرز کے سپاہی محمد آصف کے بیان کے مطابق 26 نمبر ڈیوٹی کے دوران شرپسندوں نے چھ ساتھیوں کو گاڑی سے کچلنے کی کوشش کی، ہمارے تین ساتھی شہید جبکہ تین شدید زخمی ہو گئے۔

اس کے علاوہ پرتشدد واقعات کے چشم دید گواہ پنجاب رینجرز کے سپاہی عرفان بھی ہیں، انہوں نے بتایا کہ مظاہرین نے حملہ کیا، پتھر اور فائرنگ کرتے ہوئے ہیلمٹ اور شیلڈیں چھین لی، میری بازو اور ٹانگ کو توڑ ڈالا اور میں بے ہوش ہو گیا۔

    سپاہی شہزاد کا کہنا تھا کہ ہم ڈیوٹی پر تعینات تھے کہ پی ٹی ائی کے شرپسندوں نے ہم پر پتھر برسائے، ہمارے پاس صرف Anti Roits شیلڈ پتھراؤ سے بچاؤ کے لیے تھی، ان شر پسندوں کی فائرنگ سے فائر ساتھی کے ہیلمٹ کو لگا، سر پر فائر لگنے سے ساتھی شدید زخمی ہو گیا، زخمی ساتھی اس وقت آئی سی یو میں وینٹیلیٹر پر ہے۔