اسلام آباد: امن وامان کی صورتحال پر ہونے والے اجلاس میں انتشار اور فساد کی کوشش کو روکنے کے لیے وفاقی انسداد فسادات فورس بنانے کا فیصلہ کیا گیا ہے۔

وزیراعظم کی زیر صدارت امن وامان کی صورتحال پر اعلیٰ سطح کا اجلاس ہوا جس میں آرمی چیف جنرل عاصم منیر اور نائب وزیراعظم اسحاق ڈار نے شرکت کی۔

علاوہ ازیں اجلاس میں وزیراعلیٰ پنجاب، خواجہ آصف، احد چیمہ، اعظم نذیر، عطاتارڑ، رانا ثناءاللہ نے بھی شرکت کی۔

اجلاس میں انتشار اور فساد کی کوشش کو روکنے کے لیے وفاقی انسداد فسادات فورس بنانے کا فیصلہ کیا گیا جب کہ وزیراعظم نے انتشار اور فساد پھیلانے والوں کی نشاندہی کے لیے ٹاسک فورس قائم کردی۔

ٹاسک فورس کے سربراہ وفاقی وزیرداخلہ ہوں گے، ٹاسک فورس میں وزیر قانون، وزیر اقتصادی امور اور وزیر اطلاعات شامل ہوں گے جب کہ ٹاسک فورس میں سیکیورٹی فورسز کے نمائندے بھی شامل ہوں گے۔

ٹاسک فورس 24 نومبر کو انتشار پھیلانے میں ملوث مسلح افراد کی نشاندہی کرے گی، انسداد فسادات فورس بین الاقوامی معیار کی پیشہ ورانہ صلاحیتوں سے لیس ہوگی۔

انسداد فسادات فورس کو بین الاقوامی معیار کے ساز و سامان سے لیس کیا جائے گا جب کہ اجلاس میں وفاقی فرانزک لیب کے قیام کی بھی منظوری دے دی گئی ہے۔

اسلام آباد سیف سٹی منصوبے کو جدید خطوط پر استوار کرنے کا بھی فیصلہ کیا، وفاقی پراسیکیوشن سروس کو مضبوط کرنے اور افرادی قوت بڑھانے کا بھی فیصلہ کیا گیا ہے۔