پاکستان رینجرز (سندھ) اور پولیس نے پاک کالونی میں کارروائی کر کے لیاری گینگ وار کے مطلوب ملزم آصف دبئی کو گرفتار کر لیا ہے۔

پاکستان رینجرز (سندھ) اور پولیس نے انٹیلی جنس معلومات کی بنیاد پر مشترکہ کارروائی کرتے ہوئے کراچی کے علاقے پاک کالونی سے ٹارگٹ کلنگ، اغوا برائے تاؤان، منشیات فروشی، بھتہ وصولی، متعدد پولیس مقابلوں اور گاڑیاں چھیننے اور چوری کرنے میں ملوث لیاری گینگ وار سلیم چاکلیٹی گروپ کا انتہائی مطلوب ملزم آصف عرف آصف دبئی کو گرفتار کر کے اسلحہ و ایمونیشن برآمد کر لیاگیا۔

     ملزم 2011 میں لیاری گینگسٹر امجد عرف چپو کے کہنے پر لیاری گینگ وار کمانڈر سلیم چاکلیٹی کے گروپ میں شامل ہوا۔ ملزم لیاری گینگ وار کے دیگر ساتھیوں راشد عرف کانا، سلیم چاکلیٹی، بلال، برکت عرف بھرا، امجد عرف چپو، زاہد بی ایل اے انور عرف ہڈی اور مخدوم عرف ڈاون کے ساتھ مل کر کراچی کے علاقے لیاقت آباد، حاجی مرید گوٹھ اور پرانا گولیمار کے علاقوں میں دس سے زائد افراد کے قتل و اقدام قتل، منشیات فروشی، بھتہ وصولی، مخالف گروپوں کے ساتھ لڑائیوں، پولیس مقابلوں اور گاڑی چھیننے کی متعدد کارروائیوں میں ملوث رہا ہے۔

     ابتدائی تفتیش کے مطابق ملزم 2014 کراچی آپریشن شروع ہونے کے بعد گرفتاری سے بچنے کے لیے بیرون ملک دبئی فرار ہوا اور وہاں سے ایران میں روپوش رہا۔ کچھ عرصہ قبل ملزم واپس آکرمنشیات فروشی کا کام کرتا رہا۔ لیاری گینگ وار کا نیٹ ورک دوبارہ بحال کرنے کے لیے سرگرم تھا۔

ملزم اس سے قبل 2014 میں گاڑیاں چوری کرنے کے الزام میں گرفتار ہوا اور ضمانت پر رہا ہونے کے بعد ملزم کورٹ نہ جانے کی وجہ سے مفرور ہو گیا۔ ملزم کے خلاف کراچی کے مختلف تھانوں میں متعدد ایف آئی آرز درج ہیں۔

گرفتارملزم کو بمعہ اسلحہ وایمونیشن مزید قانونی کارروائی کے لیے پولیس کے حوالے کر دیا گیا ہے۔

عوام سے اپیل ہے کہ ایسے عناصر کے بارے میں اطلاع فوری طور پر قریبی رینجرز چیک پوسٹ، رینجرز ہیلپ لائن 1101 یا رینجرز مددگار واٹس ایپ نمبر 03479001111 پر کال یا ایس ایم ایس کے ذریعے دیں۔ آپ کا نام صیغہ راز میں رکھا جائے گا۔