وزیر خزانہ محمد اورنگزیب نے کہا کہ کوئی منی بجٹ نہیں آ رہا، 12 ہزار 970 ارب روپے ہدف پورا کیا جائے گا۔

پاکستان اور آئی ایم ایف کے  مذاکرات پر وزیر خزانہ محمد اورنگزیب نے غیر رسمی گفتگو کرتے ہوئے کہا کہا کہ ٹیکس وصولیوں کو انفورسمنٹ اور انتظامی اقدامات سے بہتر کیا جائے گا۔

وزیر خزانہ نے کہا کہ پاکستان نے پرائمری سرپلس کا ہدف کامیابی سے پورا کیا ہے، جبکہ نیشنل فسکل پیکٹ کو کابینہ نے منظور کیا ہے، اب این ایف سی پر نظر ثانی کی ضرورت نہیں ہے۔

انہوں نے کہ کہ فسکل پیکٹ کی منظوری کے لیے وزیر اعلی سندھ کا خصوصی طور پر مشکور ہوں، جب بھی قومی مفاد کا معاملہ ہوا تو کے پی کو سب سے آگے پایا، آئی ایم ایف کے دورے کا مقصد معیشت کا جائزہ نہیں بلکہ اعتماد سازی میں اضافہ تھا۔

وزیر خزانہ کا یہ بھی کہنا تھا کہ آئی ایم ایف سے مذاکرات تعمیری اور با مقصد رہے، جبکہ آئی ایم ایف سے ور چوئیل مذاکرات ہوتے رہتے ہیں، کچھ نکات پر آمنے سامنے بیٹھ کربات چیت ضروری تھی، آئی ایم ایف سے حقائق کی بنیاد پر کھل کر بات چیت کی ہے۔

انہوں نے کہا کہ آئی ایم وفد نے پاکستان کی بات غور سے سنی ہےاور اس سے مطمئن نظر آئے، پی آئی  اے کی نجکاری کی بولی سے دھچکا لگا، اس کو  آگے بڑھائیں گے، جبکہ توانائی کے شعبے میں اصلاحات پر بات چیت ہوئی ہے۔

وزیر خزانہ نے مزید یہ بھی کہا کہ جینکو ، ڈسکوز اور ائیر پورٹ نجی شعبے کو دیں گے، حکومت کے  محکموں میں رائٹ سائزنگ کا کام جاری ہے، گیارہ محکموں میں رائٹ سائزنگ کا کام مکمل ہو گیا ہے، پانچ محکموں میں جاری ہے، پنشن کے نظام پر بہت کام کیا، تمام سول بیوروکریٹ پنشن میں حصہ ڈالیں گے۔