اسلام آباد: شہید رینجرز اہلکاروں پر شر پسندوں کی جانب سے گاڑی سے کچلنے پر ڈیوٹی پر مامور جوانوں کے چشم کشا بیانات منظر عام پر آگئے۔

گزشتہ رات وفاقی دارالحکومت میں پیش آنے والے افسوسناک واقعے میں سیاسی شرپسندوں نے رینجرز اہلکاروں کو تیز رفتار گاڑی سے کچل دیا تھا۔

اس حادثت کے نتیجے میں تین رینجرز اہلکار شہید اور تین زخمی ہوگئے تھے جب کہ اسلام آباد پولیس کے بھی تین اہلکار زخمی ہوئے تھے۔

اس حوالے سے ڈیوٹی پر مامور رینجرز کے جوانوں کے اہم بیانات منظر عام پر آئے ہیں۔

ایک رینجرز اہلکار نے بتایا ’’رات دو سے تین بجے کا وقت تھا جب میں جی ٹین میں ڈیوٹی سر انجام دے رہا تھا۔ دھرنے والی سائیڈ سے ایک تیز رفتار گاڑی آئی جو رینجرز اور پولیس اہلکاروں کو مار کر آگے نکل گئی‘‘۔

دوسرے رینجرز اہلکار نے مزید بتایا ’’ہم جی ٹین اسلام آباد میں پولیس کے ساتھ ڈیوٹی پر مامور تھے۔ دھرنے والے مقام سے ایک تیز رفتار گاڑی آئی جس نے ہمارے ساتھیوں کو کچل ڈالا جب کہ گاڑی کی لائٹس بھی بند تھیں اور اس نے ہمارے جوانوں کو سیدھا نشانہ بنایا‘‘۔

سیکیورٹی ذرائع کا کہنا ہے کہ سوشل میڈیا پر اس واقعے کے حوالے سے گمراہ کن پروپیگنڈا اور جھوٹ پھیلانے کی کوشش کی گئی ہے۔

سیکیورٹی ذرائع نے کہا کہ سی سی ٹی وی فوٹیجز اور رینجرز اہلکاروں کے بیانات کی مدد سے جھوٹ پھیلانے والے عناصر بے نقاب ہوگئے ہیں۔

سیکیورٹی ذرائع کا مزید کہنا تھا کہ اس واقعے میں ملوث شرپسندوں کی شناخت کا عمل جاری ہے اور انہیں قانون کے کٹہرے میں لا کر قرار واقعی سزا دی جائے گی۔