راولپنڈی: سیکیورٹی فورسز نے خیبرپختونخوا میں دو الگ الگ کارروائیاں کے دوران 3 دہشت گردوں کو جہنم واصل کردیا۔

پاک فوج کے شعبہ تعلقات عامہ (آئی ایس پی آر) کے مطابق 21 اور 22 نومبر کو خیبرپختونخواہ میں دو الگ الگ کارروائیوں میں تین خوارج مارے گئے۔

آئی ایس پی آر نے بتایا کہ پہلی کارروائی میں سیکیورٹی فورسز نے ضلع خیبر کے علاقے باڑہ میں انٹیلی جنس کی بنیاد پر آپریشن کیا۔

ترجمان پاک فوج کا کہنا ہے کہ اس کارروائی کے دوران فوجی دستوں نے خوارج کے مقام پر مؤثر طریقے سے کارروائی کی جس میں 2 خوارج، حق یار آفریدی اور گل جان کو جہنم واصل کردیا گیا۔

آئی ایس پی آر نے بتایا کہ دوسری کارروائی کے دوران جنوبی وزیرستان میں سیکیورٹی فورسز نے خارجی دہشت گردوں کے گروہ کی جانب سے پاک افغان بارڈر پار کرنے کی کوشش کو ناکام بنادیا۔

پاک فوج کے شعبہ تعلقات عامہ کے ماطبق جنوبی وزیرستان میں سیکیورٹی فورسز کی فائرنگ سے سرحد پار کرنے کی کوشش کرنے والا 1 خارجی دہشت گرد ہلاک اور 3 زخمی ہوگئے۔

آئی ایس پی آر کا کہنا تھا کہ پاکستان افغان عبوری حکومت سے موثر بارڈر مینجمنٹ نظام قائم کرنے کا مسلسل تقاضا کر رہا ہے، توقع ہے افغان عبوری حکومت اپنی ذمہ داریاں ادا کرے گی۔

ترجمان پاک فوج نے کہا کہ توقع ہے افغان عبوری حکومت خارج کی جانب سے پاکستان کے خلاف دہشت گردی کے لیے اپنی سرزمین کے استعمال کو روکے گی۔

آئی ایس پی آر کا مزید کہنا تھا کہ پاکستان کی سیکیورٹی فورسز اپنی سرحدوں کو محفوظ بنانے اور دہشت گردی کے خاتمے کے لیے پرعزم ہیں۔