کوئٹہ: بلوچستان حکومت اور یونائیٹڈ نیشن ورلڈ فوڈ پروگرام (یو این ڈبلیو ایف پی) کے درمیان ایک اہم معاہدہ طے پاگیا۔

بلوچستان حکومت اور یونائیٹڈ نیشن ورلڈ فوڈ پروگرام کے درمیان معاہدہ طے پا گیا ہے جس کے تحت 39 پرائمری اسکولوں میں 13,800 بچوں کو کھانا فراہم کیا جائے گا۔ معاہدے پر سیکرٹری تعلیم راحیلہ حمید درانی اور ڈپٹی ڈائریکٹر یو این ڈبلیو ایف پی مس کوکو نے دستخط کیے۔

اس موقع پر وزیر تعلیم راحیلہ حمید درانی نے کہا کہ اگلے سال طلباء کی تعداد 20 ہزار تک بڑھادی جائے گی۔

انہوں نے مزید بتایا کہ اس معاہدے کا دورانیہ دو سال ہوگا اور اس میں تقریباً 1.5 بلین روپے کا بجٹ مختص کیا گیا ہے۔

وزیر تعلیم نے کہا کہ یہ دن بلوچستان کے لیے ایک اہمیت کا حامل ہے اور معاہدہ 2025 تک جاری رہے گا۔

ڈپٹی ڈائریکٹر یو این ڈبلیو ایف پی مس کوکو نے اس کامیاب معاہدے کے لیے بلوچستان حکومت کے تعاون کا شکریہ ادا کیا اور کہا کہ انہیں اس دن کا بے صبری سے انتظار تھا جب کہ انہوں نے بلوچستان حکومت کے تعاون کو سراہا۔

وزیر تعلیم نے مزید کہا کہ وزیراعلیٰ بلوچستان نے محکمہ تعلیم میں ایمرجنسی نافذ کی ہوئی ہے اور وہ محکمہ تعلیم میں بہتری کے لیے بھرپور کوشاں ہیں۔

ان کا کہنا تھا کہ اس معاہدے کا مقصد تعلیمی اداروں میں بچوں کی صحت کو بہتر بنانا اور ان کی تعلیمی سرگرمیوں میں سہولت فراہم کرنا ہے۔

واضح رہے کہ یہ معاہدہ بلوچستان کے تعلیمی نظام میں اہم تبدیلیاں لانے کے لیے ایک سنگ میل ثابت ہوگا اور علاقے میں بچوں کی بہتر تعلیم اور صحت کی فراہمی میں مددگار بھی ثابت ہوگا۔