مہنگائی سے ستائے عوام کے لیے اچھی خبر، عالمی مارکیٹ میں دالوں کے قیمتیں کم ہونے سے ہول سیل بازار میں دالوں کی قیمتوں میں بڑی کمی ہوگئی ہے۔

چئیرمین ہول سیل گروسرز ایسوی ایشن رؤف ابراہیم کے مطابق انٹرنیشنل مارکیٹ میں دالوں کی قیمتوں میں 100 ڈالر فی ٹن سے زائد کمی ہوئی ہے، جبکہ بھارت، سری لنکا  کی عالمی مارکیٹ سے خریداری بند کرنے کی وجہ سے عالمی بازار میں ریٹ کم ہوئے ہیں۔

رؤف ابراہیم نے کہا کہ ریجن میں پاکستان واحد ملک ہے جو دالوں کی خریداری کر رہا ہے، 860  ڈالر فی ٹن کی قیمت کم ہو کر 750 ڈالر فی ٹن سے بھی نیچے اگئی ہے۔

رؤف ابراہیم نے یہ بھی کہا کہ عالمی بازار کم ہونے سے مقامی امپورٹرز کو کروڑوں روپے کا نقصان ہوا ہے، ستمبر سے اب تک کالا چنے کی قیمت میں 50 روپے کلو کی کمی آگئی ہے، جبکہ رواں ماہ اور اگلے ماہ دالوں کے چھ جہاز لگ رہے ہیں جس کے بعد یہ قیمت 250 روپے تک گرسکتی ہے۔

ان کا یہ بھی کہنا تھا کہ 400  روپے فی کلو چنے کی دال 360 روپے، جبکہ اگلے مہینے تک 300 روپے تک دستیاب ہوگی، ماش کی دال 500 روپے کلو سے کم ہوکر 425 روپے فی کلو میں دستیاب ہے، کابلی چنا اول نمبر 400 روپے سے کم ہوکر 355 روپے  جبکہ کابلی چنا چھوٹا ۔320 روپے سے کم ہوک 295 روپے کلو ہوگیا ہے۔

روف ابراہیم نے کہا کہ کمشنر کراچی ریٹیل کی سطح پر دالوں کی قیمتیں کم ہونے کا فائدہ عام صارف کو پہنچائیں۔