پیپلز پارٹی کی سینیٹر شیری رحمان نے کہا ہے کہ ماحولیاتی تبدیلیوں کی وجہ سے ملک کو خطرات کا سامنا ہے۔

پالیسی ادارہ برائے پائیدار ترقی کے زیر اہتمام پائیدار ترقی کانفرنس کا انعقاد ہوا، کانفرنس سے خطاب کرتے ہوئے پیپلز پارٹی کی سینیٹر شیری رحمان نے کہا کہ میں دل کی گہرائیوں سے ایس ڈی پی آئی کو مبارکباد پیش کرتی ہوں۔

انہوں نے کہا کہ یہ دوسری مرتبہ ہے کہ ایسی کانفرنس منعقد ہورہی ہے، مجھے لگتا ہے کہ ہمیں متبادل توانائی کے حوالے سے سب سے پہلے خود پر یہ چیزیں لاگو کرنی ہونگی۔

ان کا کہنا تھا کہ یہاں سے ہمیں شروع کرنا ہے کہ ہم پلاسٹک بوتل کا استعمال ترک کریں، ہمیں رزیلئنس کے حوالے سے زیادہ سے زیادہ خود کو تیار کرنا ہوگا۔

شیری رحمان نے کہا کہ 2022 کے سیلاب میں کئی لوگ گھروں سے محروم ہوگئے تھے، ان کی زندگی اب معمول پر آرہی ہے، تمام کام حکومت نہیں کرسکتی اس حوالے سے کچھ کام عوام نے بھی کرنا ہے۔

پیپلز پارٹی کی سینیٹر کا کہنا تھا کہ سماجی ذمہ داری کے تحت کمپنیوں کو ایسے حالات میں مدد کیلئے آنا ہوگا، میڈیا کے لوگوں کو اس ایوارڈ میں شامل کرنا چاہیے۔

انہوں نے کہا کہ لاہور میں آج سموگ ہے آلودگی ہے آب و ہوا صحیح نہیں ہے، میڈیا میں آج یہ خبریں پہلے صفحے پر موجود ہیں، بھارت سے فصلیں جلانے سے یہ دھواں آرہا ہے لیکن ہمیں خود بھی سوچنا ہوگا۔

ان کا کہنا تھا کہ پنجاب میں آلودگی گاڑیوں کے باعث ہے، میرے خیال میں آلودگی ایک سیریل کلر ہے، ماحولیاتی تبدیلیوں کی وجہ سے ملک کو خطرات کا سامنا ہے، موسمیاتی تبدیلی سے اس قسم کی تباہی پہلے نہیں دیکھی تھی جو 2022 میں دیکھی۔

شیری رحمان نے مزید کہا کہ نومبرکے مہینے میں اس ہال میں ایئرکنڈیشنڈ لگے ہیں جو باعثِ تشویش ہے، دنیا کے ترقی یافتہ ممالک کو ہنگامی بنیادوں پر اقدامات کرنا ہونگے، موسمیاتی تبدیلی سے ترقی پذیر ممالک زیادہ متاثر ہورہے ہیں۔