لاہور میں اسموگ کی شدت کے پیش نظر محکمہ ماحولیات نے لاہور کے اسکولز میں ایک ہفتے کی چھٹیوں کا حکم دے دیا۔

ڈی جی ماحولیات عمران حامد شیخ کی جانب سے لاہور کے پرائمری اسکول ایک ہفتے کیلئے بند کرنے کا نوٹیفکیشن جاری کردیا کردیا گیا ہے۔

ادارہ ماحولیات پنجاب کے مطابق لاہور میں نرسری سے پانچویں جماعت تک اسکولز بند رہیں گے، فیصلے کا اطلاق 4 نومبر سے 9 نومبر تک ہوگا۔

نوٹیفکیشن میں کہا گیا ہے کہ لاہور کے تمام نجی و سرکاری اسکولز چھٹیاں دینے کے پابند ہوں گے، چھٹیوں میں مزید اضافے سے متعلق فیصلہ 9 نومبر کو ہوگا۔

ادارہ ماحولیات پنجاب نے مزید کہا کہ چھٹیاں دینے کا فیصلہ فضائی آلودگی میں اضافے کے پیش نظر کیا گیا، تاہم محکمہ اسکول ایجوکیشن پنجاب کو ہدایات جاری کردی گئی ہیں۔

واضح رہے کہ باغوں کے شہر میں اسموگ کا راج برقرار ہے، صوبائی دارالحکومت میں اسموگ کی اوسط شرح خطرناک حد بھی پار کر گئی جس سے لاہور کا ایئر کوالٹی انڈیکس 778 تک پہنچ گیا، جس کی وجہ سے شہریوں کو سانس کے مسائل اور آنکھوں میں جلن کی شکایات عام ہیں۔

بھارت میں فصلوں کی باقیات جلانے سے اٹھنے والا شدید دھواں پاکستان میں داخل ہو رہا ہے، طبی ماہرین نے شہریوں کو ماسک پہن کر گھروں سے نکلنے کی ہدایت کی ہے۔