لاہور: وزیر اطلاعات پنجاب عظمیٰ بخاری نے کہا ہے کہ  حکومت پنجاب نے کسی بھی یو اے ای کے فنڈ میں سرمایہ کاری نہیں کی، اس موضوع پر حکومت پنجاب کے عہدیداروں کے ساتھ آئی ایم ایف کے اجلاس میں کبھی بات بھی نہیں ہوئی۔

عظمیٰ بخاری نے اپنے جاری کردہ بیان میں کہا ہے کہ  مذکورہ آرٹیکل میں آئی ایم ایف کے بارے میں غلط تاثر دیا گیا ہے کہ وہ پنجاب کے پہلے سہ ماہی کے خسارے پر پریشانی کا شکار ہے، آئی ایم ایف نے تسلیم کیا ہے پنجاب حکومت کو پہلے سہ ماہی کے اختتام پر تقریباً 40 ارب روپے کا سرپلس تھا، جس کے بعد وفاقی وزارت خزانہ نے اپنے اعداد و شمار درست کیے۔

انہوں نے کہا کہ پنجاب حکومت کے سرپلس کو ظاہر کرنے والے نظر ثانی شدہ مالیاتی آپریشنز بھی اپ لوڈ کیے، آرٹیکل میں یہ بھی غلط رپورٹ کیا گیا ہے کہ پنجاب اپنے 150 ارب روپے کے سرپلس ہدف سے پہلے سہ ماہی کے اختتام پر پیچھے ہے۔

صوبائی وزیر کا کہنا ہے کہ حقیقت یہ ہے کہ قومی مالیاتی معاہدے میں پنجاب کے لئے سہ ماہی سرپلس کے اہداف نہیں ہیں، آئی ایم ایف نے تسلیم کیا پنجاب اپنے متعین سرپلس کو مالی سال کے آخر تک حاصل کرنے کے لئے صحیح راستے پر گامزن ہے۔

عظمیٰ بخاری نے مزید کہا کہ پنجاب حکومت انگریزی اخبار کی غلط رپورٹنگ پر افسوس کا اظہار کرتی ہے، یہ رپورٹنگ صحافتی معیار اور صحافتی اصولوں کے خلاف ہے۔