وزیراطلاعات سندھ شرجیل انعام میمن نے کہا ہے کہ پی ٹی آئی کا موجودہ احتجاج سانحہ 9 مئی سے کم نہیں تھا۔

صوبائی وزیر شرجیل میمن نے کراچی میں پریس کانفرنس کرتے ہوئے کہا کہ دو دن سے جو کچھ ملک میں ہورہا ہے وہ افسوسناک ہے، احتجاج کے دوران جو کچھ ہوا اس نے ماضی کے تمام ریکارڈ توڑ دیے ہیں، وزیر داخلہ نے پی ٹی آئی کی لاشوں کی خواہش پوری نہیں ہونے دی۔

انہوں ںے کہا کہ پی ٹی آئی نے خیبرپختونخوا کی پوری سرکاری مشینری استعمال کی، کےپی کے ایم این ایز نے کہا ہمیں وزیراعلیٰ نے پیسے دیے تھے، کےپی ایم این ایز کو گاڑیاں بھرنے کیلئے علی امین گنڈاپور نے پیسے دیے، سمجھتاہوں انکو حکومت کرنے کا کوئی حق نہیں ہے۔

شرجیل میمن نے کہا کہ احتجاج میں علی امین گنڈا پور نے سرکاری مشینری استعمال کی، آپ کو ریلیف چاہیے تو عدالتوں سے لیں، ایسا کبھی نہیں دیکھا ہے کسی نے قانون کی رٹ کو چیلنج کیا ہو۔

وزیراطلاعات سندھ نے کہا کہ رینجرز کے جوانوں پر گاڑی چڑھا کر انہیں شہید کیا گیا، وفاقی حکومت نے بہت صبر اور تحمل کا مظاہرہ کیا۔

انکا کہنا تھا کہ بشریٰ بی بی بانی پی ٹی آئی سے دوہاتھ آگے ہیں، بشریٰ بی بی نے منفی سیاست کی، گنڈا پور اور بشریٰ بی بی نے احتجاج کی قیادت کی، بانی پی ٹی آئی کی اہلیہ عوام کے جذبات ابھارتی رہی، بانی پی ٹی آئی کہتے تھے میری اہلیہ غیرسیاسی ہیں پر وہ سیاسی نکلیں، کہتی تھیں بانی پی ٹی آئی کو رہا کیے بغیر نہیں جاؤں گی۔

شرجیل میمن نے مزید کہا کہ آپریشن شروع ہوتے ہی بشریٰ بی بی فرار ہوگئیں، پنجاب پولیس پر حملے کیے گئے، اہلکاروں کو یرغمال بنایا گیا، پی ٹی آئی ہمیشہ پاکستان کو ڈی ریل کرنے کی کوشش کرتی ہے، اہم مواقع پراحتجاج کی کال دینا اچھی روایت نہیں۔