کراچی: وزیراعلیٰ سندھ مراد علی شاہ اور روس کے سفیر البرٹ خوریف نے دوطرفہ تجارت بڑھانے پر اتفاق کیا ہے۔

وزیراعلیٰ مراد علی شاہ سے روس کے سفیر البرٹ خوریف کی ملاقات ہوئی جس میں رشین الیکٹرک بسز کراچی میں لانے پر بات چیت کی گئی۔

ملاقات کے دوران وزیراعلیٰ مراد علی شاہ نے گفتگو کرتے ہوئے کہا کہ رشین قونصل جنرل سے اچھی کوآرڈینیشن ہے، روس سے تعلقات بہتر سے بہتر اور مستحکم ہو رہے ہیں، ہم روس کے ساتھ صحت، تعلیم اور ثقافت پر تعلقات کو مزید مستحکم کرنا چاہتے ہیں۔

انہوں نے کہا کہ شہید ذوالفقار علی بھٹو کے دور میں روس نے کراچی میں اسٹیل مل لگائی تھی، ہم چاہتے ہیں کہ اسٹیل مل کو دوبارہ بحال کروائیں جس کے لئے رشین ایمبیسی مدد کرے۔

دوسری جانب رشین سفیر کا کہنا تھا کہ اگلے ہفتے روس اور پاکستان کے ماہرین آن لائن اسٹیل مل کی بحالی پر تبادلہ خیال کریں گے، آن لائن تبادلہ خیال کے بعد روس کے وفد اسٹیل مل کا دورہ کرے گا۔

وزیراعلیٰ سندھ نے تجویز دی ہے کہ اسٹیل مل کا نیا پلانٹ لگایا جائے تو بہتر ہوگا، اسٹیل مل چلنے سے معیشت کا استحکام ہوگا اور روزگار بڑھے گا، اسٹیل مل سندھ کی عوام کو شہید بھٹو کا تحفہ ہے جس کو ہم چلانا چاہتے ہیں،اسٹیل مل کے ملازمین جو بہت پریشان ہیں ان کا مسئلہ بھی حل ہوجائے گا۔

وزیراعلیٰ سندھ نے رشین کمپنیز کے ساتھ ڈپلومیٹ چینل کے ذریعے بات چیت آگے بڑھانے پر بھی اتفاق کیا اور کہا کہ محکمہ ثقافت سندھ رشین کلچر اٹیچ کے ساتھ کوآرڈینیشن کرے گی۔

سفیر البرٹ خوریف نے کہا کہ رشین حکومت سندھ میں کلچرل سینٹر قائم کر کے ثقافتی ورثہ بڑھانا چاہتی ہے۔

ملاقات میں روس کے قونصل جنرل آندرے فیڈروف، تھرڈ سیکریٹری پاول ایمانوف اور مس ایکٹرینا زیگچ شریک تھے جبکہ وزیراعلیٰ سندھ کے ساتھ سیکریٹری عبدالرحیم شیخ بھی اس موقع پر موجود تھے۔