وفاقی وزیرداخلہ محسن نقوی نے کہا کہ اسلام آباد کے امن و امان کو خراب کرنے والے ہر شخص کو گرفتار کرنا ہے۔

وفاقی وزیرداخلہ محسن نقوی علی الصبح  پولیس فورس کا حوصلہ بڑھانے پولیس لائنز پہنچ گئے، جہاں انہوں نے قیام امن کیلئے اسلام آباد پولیس  کی جانفشانی کی تعریف کی۔

 وفاقی وزیر داخلہ محسن نقوی نے پولیس لائنز میں پولیس  سے خطاب کرتے ہوئے کہا کہ 24 نومبر کو بیلاروس کا وفد اور 25 نومبر کو بیلاروس کے صدر پاکستان کا دورہ کررہے ہیں، اس کے پیش نظر ہم نے  اسلام آباد شہر کو ہر صورت محفوظ رکھنا ہے۔

محسن نقوی نے کہا کہ پولیس فورس نے اسلام آباد کو محفوظ رکھنے کے لیے ایک ٹیم کی طرح مل کر کام کرنا ہے اور اسے یقینی بنانا ہے، اس بار اسلام آباد میں قانون ہاتھ میں لینے والے کسی بھی شخص کو واپس  نہیں جانے دینا۔

ان کا یہ بھی کہنا تھا کہ ہمیں آپ اور آپ کی زندگیاں  بہت عزیز ہیں، دوران ڈیوٹی آپ نے تمام حفاظتی سامان پہننا ہے  اور پوری احتیاطی تدابیر اختیار کرنی ہیں، پولیس فورس نے ہیلمٹ اور حفاظتی جیکٹس پہن کر فرائض سرانجام دینے ہیں۔

محسن نقوی نے یہ بھی کہا کہ ہم آپ کے ساتھ کھڑے ہیں اور ہمیشہ ساتھ کھڑے رہیں گے، اس بار کسی کو وفاقی دارالحکومت میں امن وامان کی صورتحال خراب کرنے کی اجازت ہرگز نہیں دیں گے۔

محسن نقوی نے مزید یہ بھی کہا کہ امن وامان کو قائم رکھنے اور شہریوں کی جان و املاک کی حفاظت کیلئے ہر ممکن اقدامات اٹھائے جائیں گے، آئی جی اسلام آبادپولیس ۔ چیف کمشنر اسلام آباد۔ ڈی آئی جی اسلام آبادپولیس اور  پولیس افسران کی بڑی تعداد  اس موقع پر موجود تھی۔