وزیراعلیٰ سندھ سید مراد علی شاہ نے کہا کہ ہمیں اپنے بچوں کو آزادی کے ساتھ تحفظ فراہم کرنا ہے، تاکہ نئی نسل ایک رتبے اور شان سے آگے بڑہ سکے۔

وزیراعلیٰ سندھ سید مراد علی شاہ نے بچوں سے زیادتی کی روک تھام کے عالمی دن پر پیغام دیتے ہوئے کہا کہ ہر سال 19 نومبر کو بچوں سے زیادتی کی روک تھام کے عالمی دن منایا جاتا ہے۔

مراد علی شاہ نے کہا کہ اس سال  ابھرتی ہوئی ٹیکنالوجیز، بچوں کے جنسی استحصال اور جنسی استحصال سے تحفظ کے لیے خطرات اور مواقع”  کے عنوان سے یہ عالمی دن منایا جا رہا ہے۔

انہوں نے کہا کہ اس دن کے منانے کا مقصد بچوں اور ان کے والدین میں استحال کے حوالے سے  بیداری پیدا کرنا، ہمیں اپنے معاشرے سے علم، شعور اور بیداری کے ذریعے درندگی اور حیوانیت کا خاتمہ کرنا ہوگا۔

 وزیراعلیٰ سندھ  نے کہا کہ انسانی ترقی نے زندگی کو سہل بنایا ہے، وہیں بچوں کے تحفظ کے حوالے سے نئے چیلنجز بھی سامنے آئے ہیں، بچوں کو تحفظ فراہم کرنے کیلئے قوانین کی ضرورت کے ساتھ جدید ٹیکنالوجیز کو ایک مؤثر ذریعہ بنایا جا سکتا ہے۔

ان کا یہ بھی کہنا تھا کہ بچوں کو والدین اور اساتذہ جدید ٹیکنالوجیز کے درست استعمال تربیت فراہم کریں، معصوم بچوں  سے زیادتی کے خلاف روک تھام سے متعلق آگاہی فراہم کرنا ہوگی۔

 مراد علی شاہ نے کہا کہ ہماری حکومت بچوں کے تحفظ کو اولین ترجیح دیتی ہے اور اس ضمن میں تمام وسائل بروئے کار لا رہی ہے، ہم جدید ٹیکنالوجیز کے ذریعے بچوں کے تحفظ کے لیے نئے اقدامات کا آغاز کر رہے ہیں۔

انہوں نے کہا کہ سندھ حکومت بچوں کو ہر قسم کے استحصال اور تشدد سے محفوظ رکھنے کے لیے کوشاں ہے، جبکہ ہمارے بچے پاکستان کا شاندار مستقبل ہیں اور مستقبل کی منصوبہ بندی کرنے میں والدین اور درسگاہیں اپنا کردار ادا کریں۔