کراچی: ہیڈ کوارٹرز سندھ رینجرز میں ڈی جی رینجرز سندھ میجرجنرل محمد شمریز اور آئی جی سندھ کی زیر صدارت سیکیورٹی کے حوالے سے اہم اجلاس منعقد ہوا ہے۔

ترجمان سندھ رینجرز کے مطابق اجلاس کے دوران گزشتہ اجلاس میں سیکیورٹی کے لیے منظور شدہ لائحہ عمل پر پیشرفت یومِ قائد، کرسمس اور نئے سال کی تقریبات کی مناسبت سے سیکیورٹی کا جائزہ لیاگیا۔

اجلاس میں کراچی میں موجودہ امن و امان کی صورتحال اورلاء انفورسمنٹ ایجنسیز کی جانب سے عادی جرائم پیشہ افراد کے خلاف رینجرز اور پولیس کے مشترکہ آپریشن تیز کرنے، شہر کے داخلی و خارجی راستوں اور بین الصوبائی چیک پوسٹوں پر چیکنگ کے عمل کو مزید سخت بنانے کی ہدایات جاری کی گئیں۔

ترجمان نے بتایا کہ اجلاس میں حکومت کے جاری کردہ احکامات کی روشنی میں سال نو کے موقع پر اسلحہ کی نمائش، ہوائی فائرنگ پرپابندی کو یقینی بنانے اور قانون کی خلاف ورزی کرنے والے افراد کے خلاف سخت کارروائی کرنے کا فیصلہ بھی کیا گیا۔

اجلاس کے دوران یومِ قائد، کرسمس اور نئے سال کی تقریبات کے دوران سیکیورٹی کو فول پروف بنانے اور کسی بھی قسم کے سیکیورٹی خدشات سے نمٹنے کے لیے رینجرز، پولیس اور دیگرلاء انفورسمنٹ ایجنسیز کی جانب سے مشترکہ لائحہ عمل منظور کیا گیا۔

واضح رہے کہ اجلاس میں کمشنر کراچی، ایڈیشنل آئی جیز، ایڈیشنل سیکریٹری ہوم ڈیپارٹمنٹ، جوائنٹ ڈی جی آئی بی، ڈی آئی جیز، سی ٹی ڈی اور رینجرز اور حساس اداروں کے اعلیٰ افسران نے شرکت کی۔