وزیراعظم شہبازشریف نے کہا کہ امریکی پابندیوں کا کوئی جواز نہیں، ایٹمی پروگرام پر کبھی سمجھوتہ نہیں کریں گے۔

وزیراعظم شہبازشریف نے کابینہ اجلاس میں گفتگو کرتے ہوئے کہا کہ گزشتہ چند ماہ سے دہشت گردی کے واقعات میں اضافہ ہواہے، چنددن پہلے خارجیوں کے حملے میں17اہلکار شہیدہوئے، جبکہ سیکیورٹی فورسزنے 8 خوارج کو جہنم واصل کیا۔

وزیراعظم نے کہا کہ سپہ سالار خود وہاں گئے اور خاندانوں کاحوصلہ بڑھایا، دہشت گردی کاخاتمہ کیے بغیر معاشی استحکام حاصل نہیں ہوسکتا، دہشت گردی کا بھرپور مقابلہ کیاجارہا ہے۔

 شہبازشریف نے اجلاس کے دوران یہ بھی کہا کہ دہشت گردی کےخاتمے تک چین سے نہیں بیٹھیں گے، پاکستان کےخلاف مذموم کوششیں کامیاب نہیں ہونےدیں گے۔

وزیراعظم نے کہا کہ پاراچنارمیں واقعہ ہوا،اس دوران اسلام آباد پر چڑھائی کی گئی، بلوچستان اور خیبرپختونخوامیں دہشت گردی کے الگ عوامل ہیں۔

شہبازشریف نے کہا کہ قربانیاں رائیگاں نہیں جائیں گی، پاکستان انشااللہ سرخرو ہوگا، پاکستان کادفاعی نظام جارحیت کیلئے نہیں ہے۔

وزیراعظم نے کہا کہ پاکستان کا نیوکلیئر پروگرام  24کروڑ عوام کاپروگرام ہے، پاکستان کے ایٹمی پروگرام پر پابندیوں کاکوئی جواز نہیں، پی ٹی آئی کے ساتھ کل ہماری پہلی میٹنگ بھی ہوگئی۔

شہبازشریف نے کہا کہ جنوری کواس میٹنگ کااگلاسیشن ہوگا، قومی مفاد کا تقاضا ہے ذاتی مفادات کوقومی مفادات کےتابع کریں ذاتی پسند، ناپسندکو قوم کی خاطرقربان کریں۔

کابینہ اجلاس میں شہدا کےایصال ثواب کے لیے فاتحہ خوانی بھی کی گئی۔