اسلام آباد: وزیراعظم محمد شہباز شریف نے یونان میں جزیرے کے قریب پاکستانیوں کے جاں بحق ہونے پر افسوس کا اظہار کرتے ہوئے وزیر داخلہ محسن نقوی کو واقعے کی انکوائری کی رپورٹ جلد ازجلد پیش کرنے کی ہدایت کردی۔

شہباز شریف نے اپنے جاری کردہ بیان میں کہا کہ انسانی اسمگلنگ ایک اندوہناک جرم ہے جس کی وجہ سے کئی افراد کی جانیں جاتی ہیں اور ہر سال کئی گھر اجڑ جاتے ہیں۔

انکا کہنا تھا کہ انسانی اسمگلر ایک ایسا ظالم مافیہ ہے جو کہ غریب عوام کو جھوٹے اور سنہری خواب دکھا کر ان سے پیسے بٹورتا ہے، ایسے افراد کی شناخت کی جائے اور ان کو سخت سزائیں دی جائیں تاکہ وہ ایسے قبیح فعل  کو نہ دھرائیں۔

وزیراعظم نے اس سلسلے میں تمام ضروری اقدامات اٹھانے کی ہدایت دیتے ہوئے کہا کہ ایسے واقعات کے مستقبل میں تدارک کے لئے ٹھوس اقدامات اٹھائے جائیں۔

وزیرداخلہ محسن نقوی کا تحقیقات کا حکم 

وفاقی وزیر داخلہ محسن نقوی نے غیر قانونی طور پر یورپ جانے والے تارکین وطن کی کشتی الٹنے کے واقعے کا نوٹس لیتے ہوئے افسوسناک واقعے کی تحقیقات کا حکم دے دیا۔

محسن نقوی نے غیر قانونی طور پر یورپ جانے والے بعض پاکستانی شہریوں کے جاں بحق ہونے پر افسوس کا اظہار کرتے ہوئے کہا کہ ایڈیشنل سیکریٹری داخلہ رفعت مختار راجہ کی سربراہی میں انکوائری کمیٹی تشکیل دے دی گئی ہے۔ کمیٹی افسوسناک واقعے کی تحقیقات کرکے 5 روز میں رپورٹ وزیرداخلہ کو پیش کرے گی۔

انہوں نے مزید کہا کہ انسانی اسمگلنگ ناقابل برداشت جرم ہے، انسانی اسمگلنگ میں ملوث مافیا کئی گھر اجاڑ چکا ہے، اس مافیا کی سرکوبی کے لئے ایف آئی اے بلا امتیاز ملک گیر ایکشن لے۔

واضح رہے کہ یونان کے جنوبی جزیرے گیودوس میں مہاجرین کو لے کر جانے والی کشتی ڈوبنے سے 5 افراد ہلاک ہوگئے جبکہ ہلاکتوں میں مزید اضافہ کا خدشہ ہے تاہم پاکستانیوں سمیت دیگر ممالک کے چند شہریوں کو بچالیا گیا ہے۔