ریاض: وفاقی وزیرداخلہ محسن نقوی کی سعودی عرب کے وزیر داخلہ شہزادہ عبدالعزیز بن سعود بن نائف سے وزارت داخلہ کے ہیڈ کوارٹر میں ملاقات ہوئی ہے۔

ملاقات کے دوران پاکستان اور سعودی عرب کے وزرائے داخلہ نے سیکیورٹی تعاون پر تبادلہ خیال کیا اور منشیات کی اسمگلنگ سے نمٹنے کے اقدامات اور باہمی دلچسپی کے دیگر امور پر بھی گفتگو کی۔

ملاقات میں انسداد منشیات کے حوالے سے تعاون بڑھانے کے حوالے سے بھی بات چیت کی گئی جبکہ شہزادہ عبدالعزیز بن سعود نے اپنے پاکستانی ہم منصب محسن نقوی اور وفد کے دیگر ارکان کا خیرمقدم کیا۔

اس موقع پر محسن نقوی نے گفتگو کرتے ہوئے کہا کہ سعودی عرب سے ہر پاکستانی کا مذہبی عقیدت و احترام کا رشتہ ہے،سعودی عرب نے ہر مشکل میں ہمیشہ پاکستان کا ساتھ دیا ہے۔

انہوں نے مزید کہا کہ سعودی عرب کی ویژنری قیادت اور عوام کے لئے نیک خواہشات رکھتے ہیں، سعودی عرب کی بے پایاں سپورٹ پر دل سے شکریہ ادا کرتے ہیں۔

واضح رہے کہ سعودی عرب کے نائب وزیر داخلہ ناصر الداؤد، وزارت داخلہ کے انڈر سیکریٹری ڈاکٹر خالد الباطل، پبلک سیکیورٹی کے ڈائریکٹر لیفٹیننٹ جنرل محمد البسامی، ڈرگ کنٹرول کے ڈائریکٹر جنرل میجر جنرل محمد القرنی  بھی ملاقات کے موقع پر موجود تھے۔

علاوہ ازیں ملاقات میں سعودی عرب میں پاکستان کے سفیر احمد فاروق سمیت پاکستانی وفد میں ڈائریکٹر جنرل پاسپورٹ اینڈ امیگریشن مصطفیٰ جمال قاضی اور وزارت داخلہ کے ایڈیشنل سیکریٹری رفعت مختار راجہ بھی شامل تھے۔