بیلٹ وے گرڈ پالیسی سینٹر کی ریسرچ میں پی ٹی آئی کی پالیسیوں کو جمہوریت کے منافی قرار دے دیا گیا۔

پاکستان میں پی ٹی آئی کے احتجاج اور پروپیگنڈے کے اثرات پر بیلٹ وے گرڈ پالیسی سینٹر نے ریسرچ جاری کردی ہے جس میں ڈاکٹر الیگزینڈرا کالڈویل نے پی ٹی آئی کی مہم جوئی کو منفی قرار دے دیا۔

ریسرچ کے مطابق پاکستان میں مظاہروں سے یومیہ 190 ارب روپے کا معاشی نقصان اٹھانا پڑا جب کہ ریٹیل، ہوٹلنگ اور لاجسٹک کے شعبوں کی آمدن کم ہو کر 50 فیصد رہ گئی۔

ریسرچ میں آئی ایم ایف معاہدوں پر عمل درآمد میں احتجاجی مظاہروں کو بڑی رکاوٹ قرار دیا گیا جب کہ پرتشدد مظاہروں کے دوران سرکاری املاک کو شدید نقصان پہنچا۔

رپورٹ کے مطابق سوشل میڈیا پر فیک نیوز کا انبار پاکستان میں جاری پرتشدد مظاہروں کی اہم وجہ قرار دیا گیا ہے جب کہ مظاہرین کی جانب سے عدالت کے احکامات کی کھلم کھلا خلاف ورزی کی گئی ہے۔

ڈاکٹر الیگزینڈرا کی جانب سے جمہوریت کے لیے پی ٹی آئی کا پرتشدد مظاہروں کا رجحان انتہائی مہلک قرار دیا گیا جب کہ پاکستان میں جاری احتجاج کو امریکہ میں ہونے والے کیپیٹل ہل فسادات سے تشبیہ دی گئی ہے۔

ریسرچ میں کہا گیا ہے کہ احتجاج کی وجہ سے سیاحت پر بھی شدید منفی اثرات مرتب ہوئے ہیں، معاشی اشاریوں میں گراوٹ کی ایک بڑی وجہ احتجاج سے پھیلنے والی غیر یقینی صورتحال کو قرار دیا گیا ہے ۔

ڈاکٹر الیگزینڈرا کا کہنا تھا کہ احتجاج میں شامل افراد انتہائی منظم حکمت عملی کے تحت تمام کارروائیاں کرتے ہیں اور معاشرے میں ان پرتشدد کارروائیوں سے انتہائی منفی اور شدت پسندانہ سمیت نفرت پر مبنی رویوں کو فروغ مل رہا ہے۔