وزیر بلدیات سندھ سعید غنی نے کہا کہ تمام ٹائونز کے ترقیاتی منصوبوں پر کسی قسم کا کوئی سمجھوتہ نہیں کیا جائے گا۔

وزیر بلدیات سندھ سعید غنی کی زیر صدارت پیپلز پارٹی سے تعلق رکھنے والے کراچی کے ٹاؤنز چیئرمینز کا اہم اجلاس منعقد ہوا۔

اجلاس میں چیئرمینز نے اپنے اپنے ٹائونز میں اب تک کئے جانے والے کاموں اور انہیں درپیش مسائل سے صوبائی وزیر کو آگاہ کیا۔

اجلاس کے دوران سعید غنی نے کہا کہ تمام ٹائونز کے چیئرمینز اپنے اپنے ٹائونز میں ترقیاتی کاموں کو تیز کریں اور جو ترقیاتی کام جاری ہیں ان کو مقررہ وقت میں مکمل کیا جائے، جبکہ جن جن ٹائونز میں سوئی گیس، واٹر بورڈ یا دیگر کسی ادارے کے کام جاری ہیں ان کے کاموں کو تیز کروایا جائے اور فوری وہاں گلیاں اور سڑکوں کی تعمیر کی جائے۔

 سعید غنی نے کہا کہ چیئرمین بلاول بھٹو زرداری کی واضح اور دو ٹوک ہدایات ہیں کہ منتخب نمائندے بلا رنگ و نسل اور سیاسی وابستگی صرف اور صرف عوامی خدمت کو اپنا شعار بنائیں، جن جن ٹائونز میں کسی قسم کے کوئی مسائل ہیں تو اس کو ترجیعی بنیادوں پر حل کیا جائے گا۔

 سعید غنی نے مزید یہ بھی کہا کہ کراچی کے عوام کے اعتماد پر پورا اترنا تمام منتخب نمائندوں کی اولین ذمہ داری ہے اور اگر کوئی یہ ذمہ داری پوری کرنے میں ناکام رہتا ہے تو اس کے خلاف سخت کارروائی عمل میں لائی جائے گی۔

اجلاس میں پیپلز پارٹی کراچی کے جنرل سیکرٹری و ڈسٹرکٹ سائوتھ کے صدر جاوید ناگوری، تمام ٹائونز کے چیئرمینز اور دیگر نے شرکت کی۔