وزیر اعلیٰ پنجاب مریم نواز شریف نے کہا ہے کہ حکومت پنجاب شنگھائی حکام کے ساتھ آئی ٹی سیکٹر کو فروغ دینے کیلئے پوری طرح تیار ہے۔

وزیر اعلیٰ مریم نواز شریف شنگھائی پہنچ گئیں جہاں انکی کیمونسٹ پارٹی آف چائنہ کی شنگھائی کمیٹی کے ڈپٹی سیکریٹری مسٹر زؤ زونگ منگ سے ملاقات ہوئی۔

کیمونسٹ پارٹی آف چائنہ کی شنگھائی کمیٹی کے ڈپٹی سیکریٹری مسٹر زؤ زونگ منگ نے وزیر اعلیٰ مریم نوازشریف کا پرتپاک خیر مقدم کیا اور پنجاب اور شنگھائی کے درمیان معاشی تعلقات کو مزید مستحق کرنے کے عزم کا اظہار کیا۔

 ملاقات میں تجارت، سرمایہ کاری، سائنس، ٹیکنالوجی، انڈسٹری اور انڈسٹری میں تعاون کو مزید فروغ دینے کی ضرورت پر زور دیا گیا اور اکنامک اور ٹیکنالوجی کے شعبوں میں تعاون بڑھانے پر تبادلہ خیال بھی کیا گیا۔

وزیر اعلیٰ مریم نواز نے پاکستانی طلبہ اور ماہرین کو ٹریننگ اور تعلیم کے مواقع فراہم کرنے پر شکریہ ادا کیا اور شنگھائی بیسڈ کمپنیوں کو پنجاب کے اسپیشل اکنامک زونز میں سرمایہ کاری کی دعوت دی۔

اس موقع پر مریم نواز نے گفتگو کرتے ہوئے کہا کہ عالمی سطح پرشنگھائی کا فنانشل اور ٹریڈ ہب کے طور پر ابھرنا قابل تحسین امر ہے، آٹو موبائل، آئی ٹی، سیمی کنڈکٹر اور روبوٹک سمیت دیگرشعبوں میں شنگھائی کی کمپنیوں سے اشتراک کار چاہتے ہیں۔

انہوں نے کہا کہ چین کے تعاون سے ماہرین کی کیپسٹی بلڈنگ سے پاکستان میں آئی ٹی انڈسٹری تیزی سے فروغ پارہی ہے، پاکستان کا آئی ٹی سیکٹرمایہ ناز صدر زی جن پنگ کے ویژن کے مطابق ترقی کرنے کی صلاحیت سے مالا مال ہے۔

وزیراعلیٰ کا کہنا تھا کہ حکومت پنجاب شنگھائی حکام کے ساتھ آئی ٹی سیکٹر کو فروغ دینے کیلئے پوری طرح تیار ہیں، پاکستان اور چین نوازشریف اور شہبازشریف کے دورہ حکومت میں مزید قریب آئے، اہل چین سے انس میرے خون میں شامل ہے۔

مریم نواز نے مزید کہا کہ چائنا پاکستان اکنامک کاریڈور جیسے گیم چینجر پراجیکٹ کا آغاز نوازشریف اور شہبازشریف کے دورہ حکومت میں ہی ممکن ہوا، کئی سال کے سیاسی اور معاشی عدم استحکام کے بعد پاکستان کی معیشت اور معاشی اعشاریے بڑھوتری کی طرف گامزن ہیں، چین کی کمپنیوں کو پنجاب میں سرمایہ کاری پر ترجیحاً سہولیات دی جائیں گی۔

ڈپٹی سیکرٹری مسٹر زؤ زونگ منگ کا کہنا تھا کہ تجارت، سرمایہ کاری، انفرااسٹرکچر اور عوامی رابطے، باہمی تعلقات کو مزید مستحق کریں گے۔