پیپلز پارٹی کے چیئرمین بلاول بھٹو زرداری نے کہا ہے کہ انسانی حقوق کی پاسداری ایک پائیدار اور خوشحال مستقبل کے لیے ناگزیر ہے۔

پی پی پی چیئرمین بلاول بھٹو نے انسانی حقوق کے عالمی دن  پر پیغام دیتے ہوئے کہا کہ انسانی حقوق کی پاسداری ایک منصفانہ، جامع اور پرامن معاشرے کی بنیاد ہیں، انسانی حقوق صرف قابلِ حصول مقاصد نہیں بلکہ وقار، مساوات اور انصاف کے لیے بنیادی ستون ہیں، کسی بھی معاشرے کا مستقبل ان حقوق کو بلا تفریق تمام افراد کے لیے یقینی بنانے پر منحصر ہے۔

انہوں نے کہا کہ 1973ع کے آئین میں شہید  بھٹو کی جانب سے شامل کیے گئے آئینی حقوق کے تحفظ کے لیے پرعزم ہیں، قائدِ عوام کا وژن “ایک شہری، ایک ووٹ” عوام کو طاقت کا اصل سرچشمہ بنانے کی بنیاد ہے۔

بلاول بھٹو نے کہا کہ آج ہم اسلامی دنیا کی پہلی خاتون وزیر اعظم کی میراث کو بھی خراج عقیدت  پیش کرتے ہیں، شہید محترمہ بینظیر بھٹو نے انسانی حقوق کے تحفظ کے لیے پاکسان میں انقلابی اقدامات کیے، بی بی شہید نے خواتین کی خود مختاری کے ذریعے صنفی امتیاز کا خاتمہ اور غیرت کے نام پر قتل و تشدد کی روکتھام  کے لیے اقدام کیے۔

پی پی چیئرمین نے کہا کہ شہید محترمہ بینظیر بھٹو نے آزادی اظہار کے تحفظ کے لیے آمرانہ دور کے قوانین کا خاتمہ کیا، انہوں نے اقلیتوں اور مزدوروں کے حقوق کے تحفظ کے لیے قانونسازی کی۔

انکا کہنا تھا کہ صدر آصف علی زرداری کے دورِ صدارت میں انسانی حقوق کے  تحفظ و فروغ کے لیے تاریخی خدمات کیے گئے، ان کے دور میں 18ویں آئینی ترمیم کے ذریعے جمہوری اصولوں کو بحال کیا اور انسانی حقوق کو محفوظ بنایا گیا، آرٹیکل 25-اے کی شکل میں تعلیم کے حق کو آئینی تحفظ فراہم کیا گیا، کام کی جگہ پر خواتین کو ہراساں کرنے اور گھریلو تشدد کے خلاف قوانین کے نفاذ کو بھی نمایاں کیا۔

انہوں نے کہا کہ صدر زرداری کی قیادت میں پاکستان نے انسانی حقوق کے حوالے سے کئی بین الاقوامی کنونشنز اور معاہدوں پر دستخط کیے، ان کے مذکورہ اقدام پاکستانی معاشرے کی اصل روح کو عالمی سطح پر فروغ دینے کا باعث بنے۔

بلاول بھٹو نے کہا کہ بینظیر انکم سپورٹ پروگرام  جیسے اقدامات نے پسماندہ طبقوں، خاص طور پر غریب خواتین، کے لیے ایک سماجی تحفظ فراہم کیا، بینظیر انکم سپورٹ پروگرام  جامعیت اور سماجی انصاف کے لیے پی پی پی کے عزم کا ثبوت ہیں۔

انکا کہنا تھا کہ وفاقی اور صوبائی حکومتیں  شہری آزادیوں کے تحفظ، جامع ترقی کو فروغ دینے کے لیے کوششیں تیز کریں، تمام شہریوں، خاص طور پر کمزور اور پسماندہ طبقات، کے لیے مساوی مواقع کو یقینی بنانے کی کوششوں کو تیز کی جائیں۔

پیپلز پارٹی کے چیئرمین نے کہا کہ پاکستانی نوجوان اپنے حقوق کے تحفظ کے لیے فعال کردار ادا کریں، کیونکہ ایک روشن مستقبل کی تشکیل میں نوجوانوں  کی شرکت کلیدی حیثیت رکھتی ہے۔

انہوں نے کہا کہ انسانی حقوق کی پالیسی کی منظوری حکومتِ سندھ کا قابل تحسین اقدام ہے، متعلقہ حکام انسانی حقوق کے تحفظ اور فروغ کے لیے حکومتِ سندھ کی مذکورہ پالیسی کے مرحلہ وار نفاذ کو یقینی بنایا جائے۔

انکا کہنا تھا کہ انسانی حقوق کی دنیا بھر میں جاری خلاف ورزیوں، خاص طور پر مقبوضہ کشمیر اور غزہ میں، پر باعثِ تشویش ہیں، عالمی برادری مقبوضہ کشمیر اور غزہ میں جاری ناانصافیوں کے خلاف مؤثر اقدامات کرے، عالمی برادری کوانسانی حقوق کے عالمی اعلامیے کے اصولوں پر دوبارہ اپنے عزم کا اظہار کرنا چاہیے۔

بلاول بھٹو نے مزید کہا کہ پیپلز پارٹی ہر شہری کے حقوق کے تحفظ کے لیے پرعزم ہے، ہم ایسے پاکستان کی تعمیر کے لیے کوشاں ہیں جو آزادی، مساوات اور انصاف کے اصولوں کی عکاسی کرتا ہو، پیپلز پارٹی کا ہمیشہ سے یہ یقین  ہے کہ عوام ہی اصل طاقت کا سرچشمہ ہیں اور ان کے حقوق پر سمجھوتہ نہیں ہوسکتا۔