اسلام آباد: عمر قید کے ملزم عثمان کی جیل میں عمر قید کاٹنے کے بعد اپیل سماعت کے لیے مقرر ہونے کا انکشاف ہوا ہے۔

سپریم کورٹ میں جسٹس جمال خان مندوخیل کی سربراہی میں تین رکنی بینچ نے عمر قید کے مقدمے کی دلچسپ سماعت کی جس میں ملزم عثمان کی جیل میں عمر قید کاٹنے کے بعد اپیل سماعت کے لئے مقرر ہونے کا انکشاف ہوا۔

سماعت کے دوران سرکاری پراسیکیوٹر نے کہا کہ اس کیس میں ملزم سزا کاٹ کر جیل سے بری ہوچکا ہے جس پر جسٹس جمال مندوخیل نے بتایا کہ 2017 میں ملزم نے سزا کے خلاف جیل پٹیشن دائر کی۔

جسٹس اطہر من اللہ نے ریمارکس دیے کہ اپیل سماعت کے لئے مقرر نہ ہونے پر 2017 سے تمام چیف جسٹس صاحبان ذمہ دار ہیں، سپریم کورٹ بھی انتظامی طور پر اپیل مقرر نہ ہونے کا ذمہ دار ہے۔

جسٹس اطہر من اللہ کا کہنا تھا کہ صدر، گورنر اور پارلیمنٹ کے پاس عدلیہ سے رپورٹ منگوانے کے اختیارات ہیں، فوجداری کیس پر تفتیش کے لئے محض 350 روپے مختص کیے جاتے ہیں جب کہ تفتیش اور فوجداری نظام میں اصلاحات کی ضرورت ہے۔

جسٹس شہزاد ملک نے کہا کہ سپریم کورٹ میں ججز کی تعداد بڑھائی گئی۔ اے ٹی سی، اسپیشل کورٹ سمیت ماتحت عدلیہ میں ججز تعداد بڑھانے کی ضرورت ہے۔

جسٹس شہزاد ملک کہتے ہیں کہ عام عدالتوں میں ججز اور اسٹاف کی کمی ہے، ججز کی تعداد بڑھانے کے ساتھ انفراسٹرکچر بھی مہیا کیا جانا چاہیے۔

ڈپٹی ایڈوکیٹ جنرل کی پی کے کوثر علی نے کہا کہ اختیارات کسی اور کے پاس ہیں، خیبرپختونخواہ ہاؤس پر اسلام آباد میں حملہ ہوا، سپریم کورٹ نے کیا کیا۔

جسٹس جمال مندوخیل نے ڈپٹی ایڈوکیٹ جنرل پوچھا کہ کیا آپ نے خیبرپختونخواہ ہاؤس کے معاملے پر آئینی درخواست دائر کی جب کہ عدالت نے ڈپٹی ایڈوکیٹ جنرل خیبرپختونخواہ کی سرزنش کردی۔

جسٹس  جمال مندوخیل نے کہا عدالت میں سیاست نہ کریں، یہ عام لوگوں کے مقدمات ہیں۔ فوجداری اور سروس کے مقدمات میں صوبہ بھی انصاف کرے۔

جسٹس شہزاد ملک نے کہا لاہور ہائی کورٹ میں چار لاکھ مقدمات زیر التوا ہیں۔

واضح رہے کہ ملزم عثمان کو 2007 شیخوپورہ میں یاسین نامی شخص کو قتل کرنے پر عمر قید کی سزا ہوئی تھی، عدالت نے ملزم کی عمر قید کی سزا کرکے جیل سے رہا ہونے کے سبب مقدمہ نمٹا دیا ہے۔