اسلام آباد: وفاقی وزیر خزانہ محمد اورنگزیب کی زیر صدارت ہونے والے نیشنل ٹیکس کونسل کے اجلاس کی اندرونی کہانی سامنے آگئی۔

ذرائع کے مطابق وزیر خزانہ محمد اورنگزیب کی زیر صدارت نیشنل ٹیکس کونسل کا اجلاس ہوا جس میں ٹیکس نظام میں بہتری کیلئے وفاق اور صوبوں پر مشتمل ایگزیکٹیو کمیٹی قائم کرنے کا فیصلہ کیا گیا۔

دوران اجلاس آئی ایم ایف شرائط کے مطابق وفاق اور صوبوں میں ٹیکس ریونیو بڑھانے کیلئے اقدامات تیز کرنے پر اتفاق ہوا اور زرعی آمدن پر ٹیکس وصولی کیلئے صوبائی قانون سازی مکمل کرنے پر زور دیا گیا۔

ذرائع کا کہنا تھا کہ چیئرمین ایف بی آر کی سربراہی میں ایگزیکٹیو کمیٹی میں صوبائی ریونیو اتھارٹیز کو نمائندگی دی جائے گی، ٹیکس سے متعلق مسائل کے حل کیلئے ایگزیکٹیو کمیٹی کا اجلاس ہر مہینے منعقد کیا جائے گا۔

زرعی آمدن پر ٹیکس وصولی کیلئے کے پی کے حکومت نے جلد قانون سازی کی یقین دہانی کرائی اور بتایا کہ بلوچستان کابینہ نے بھی بل کی منظوری دی ہے جو جلد اسمبلی میں پیش کیا جائے گا۔

ذرائع کے مطابق اجلاس میں کہا گیا کہ سندھ حکومت زرعی آمدن پر ٹیکس وصولی کیلئے قانون سازی میں سب سے پیچھے ہے، قانون سازی کے حوالے سے وزیر اعلیٰ سندھ سے بات کی جائے گی۔

ذرائع نے مزید کہا کہ رئیل اسٹیٹ اور پراپرٹی سمیت دیگر شعبوں سے ٹیکس وصولی کا طریقہ کار طے کیا جائے گا، وفاق اور صوبے ٹیکس سے متعلق معلومات کے تبادلے کا طریقہ کار طے کریں گے۔

اجلاس کے دوران نیشنل ٹیکس کونسل کا اجلاس اب ہر تین ماہ بعد منعقد کرنے کا بھی فیصلہ کیا گیا جس میں عالمی بینک کے حکام وفاق اور صوبوں میں ہم آہنگی اور سنگل ونڈو کے حوالے سے معاونت دیں گے۔