استنبول: پاکستان اور لبنان کے وزیر اطلاعات نے دو طرفہ تعلقات کو مزید مضبوط کرنے کے عزم کا اعادہ کیا ہے۔

وفاقی وزیر اطلاعات عطاء اللہ تارڑ اور لبنان کے وزیر اطلاعات زیاد میکیری کے درمیان ملاقات ہوئی جس میں لبنان کی علاقائی سالمیت اور امن کے قیام کے حوالے سے عزم کا اعادہ کیا گیا۔

وفاقی وزیر عطاء تارڑ نے بیروت کے راستے شام میں پھنسے پاکستانی شہریوں کے فوری انخلاءمیں سہولت فراہم کرنے پر لبنان کی قیادت کا شکریہ ادا کیا اور کہاکہ دونوں وزرائے اعظم کے درمیان ہونے والی بات چیت نے شام میں پھنسے پاکستانیوں کی وطن واپسی کا راستہ ہموار کیا جس پر لبنان کی حکومت کے شکر گزار ہیں۔

انکا کہنا تھا کہ وزیراعظم شہباز شریف کی کال پر لبنان کے وزیراعظم نے فوری ایکشن لیتے ہوئے شام میں پھنسے پاکستانیوں کو فوری سہولت فراہم کی جو کہ ہمارے تعلقات کی مضبوطی ظاہر ہوتی ہے۔

عطاء تارڑ نے مزید کہا کہ پاکستان اور لبنان کے درمیان برادرانہ اور گرمجوشی پر مبنی تعلقات ہیں، پاکستان لبنان کے ساتھ تعلقات کو مزید مضبوط بنانے کا خواہاں ہے، پوری پاکستانی قوم اس مشکل وقت میں لبنان کے عوام کے ساتھ کھڑی ہے۔

دوسری جانب لبنانی وزیر اطلاعات کا کہنا تھا کہ پاکستان نے ہر مشکل وقت میں لبنان کا ساتھ دیا، جنگ سے متاثرہ لبنان کے عوام کے لیے امدادی سامان بھجوانے پر وزیر اعظم شہباز شریف اور پاکستان کی حکومت کے شکر گزار ہیں۔

انہوں نے مزید کہا کہ دونوں ملکوں کے تعلقات کی مضبوطی اس بات سے ظاہر ہوتی ہے کہ مشکل وقت میں پاکستان نے لبنان کے عوام کی امداد کی، بیروت کے ایئرپورٹ پر پاکستانیوں کی بڑی تعداد دیکھ کر خوشی ہوئی کہ وہ وطن واپس لوٹ رہے ہیں۔