اسپیکر قومی اسمبلی سردار ایاز صادق نے کہا ہے کہ پاکستان سعودی عرب کے ساتھ اپنے دیرینہ اور برادرانہ تعلقات کو انتہائی قدر کی نگاہ سے دیکھتا ہے۔

سعودی عرب کی شوریٰ کونسل کے چیئرمین ڈاکٹر عبداللہ بن محمد بن ابراہیم الشیخ کی اعلیٰ سطحی پارلیمانی وفد کے ہمراہ اسلام آباد آمد ہوئی۔

 اسپیکر قومی اسمبلی سردار ایاز صادق نے اسلام آباد انٹرنیشنل ایئرپورٹ پر معزز مہمان کا استقبال کیا۔

اس موقع پر بچوں نے شوریٰ کونسل کے چیئرمین کو گلدستہ پیش کیا۔

اسپیکر قومی اسمبلی سردار ایاز صادق نے کہا کہ آپ کے دورہ پاکستان پر دلی مسرت ہوئی، پاکستان سعودی عرب کے ساتھ اپنے دیرینہ اور برادرانہ تعلقات کو انتہائی قدر کی نگاہ سے دیکھتا ہے۔

ان کا کہنا تھا کہ دونوں ممالک ہر مشکل وقت میں ایک دوسرے کے شانہ بشانہ کھڑے رہے ہیں، سعودی عرب کی شوریٰ کونسل کے چیئرمین کا دورہ پاکستان دوطرفہ پارلیمانی رابطوں کو فروغ دینے میں اہم پیش خیمہ ثابت ہو گا۔

چیئرمین سعودی مجلسِ شوریٰ کونسل ڈاکٹر عبداللہ بن محمد بن ابراہیم الشیخ نے اس موقع پر کہا کہ پاکستان کا دورہ کر کے انتہائی خوشی محسوس کر رہا ہوں، پرتپاک استقبال پر اسپیکر قومی اسمبلی کا مشکور ہوں۔

انہوں نے مزید کہا کہ دورہ پاکستان کے دوران ہمیشہ خلوص اور محبت ملی ہے۔

سعودی شوریٰ کونسل کے چیئرمین ڈاکٹر عبدالله بن محمّد بن ابراہیم الشیخ، اسپیکر قومی اسمبلی سردار ایاز صادق کی دعوت پر پاکستان کا دورہ کر رہے۔

سعودی شوریٰ کونسل کے چیئرمین پاکستان میں اپنے قیام کے دوران اسپیکر قومی اسمبلی کے علاوہ صدر مملکت، وزیراعظم پاکستان، چیئرمین سینٹ اور دیگر سیاسی رہنماؤں سے علیحدہ علیحدہ ملاقاتیں کریں گے۔

سعودی شوریٰ کونسل کے چیئرمین کے دورہ پاکستان کو انتہائی اہمیت دی جارہی ہے۔

سعودی شوریٰ کونسل کے چیئرمین کے دورہ پاکستان سے پارلیمانی روابط کو فروغ حاصل ہو گا۔