کراچی: صدر ایف پی سی سی آئی عاطف اکرام شیخ نے شرح سود میں 2 فیصد کے فیصلے کا خیر مقدم کرتے ہوئے خوش آئند قرار دے دیا۔

فیڈریشن آف پاکستان چیمبرز آف کامرس اینڈ انڈسٹریز کے صدر عاطف اکرام شیخ کا کہنا ہے کہ پالیسی ریٹ میں کمی سے معاشی ترقی میں مدد ملے گی۔

عاطف اکرام شیخ نے کہا ہے کہ اسٹیٹ بینک کی جانب سے پالیسی ریٹ میں 200 بیسز پوائنٹس کی کمی خوش آئند ہے، شرح سود میں مزید کمی کی گنجائش ہے۔

مرکزی بینک کی جانب سے شرح سود میں 2 فیصد کمی کے اعلان پر عاطف اکرام شیخ نے اس فیصلے کا خیر مقدم کرتے ہوئے کہا کہ مانیٹری پالیسی کے اگلے اعلان میں 400 بیسز پوائنٹس کمی ہوسکتی ہے، گزشتہ چھ ماہ میں پالیسی ریٹ میں 9 فیصد کی کمی ہوئی ہے۔

عاطف اکرام شیخ کا کہنا تھا کہ پالیسی ریٹ میں کمی سے معاشی ترقی میں اضافہ ہوگا، سرمایہ کاری، برآمدات سمیت کرنسی سرکولیشن میں بھی اضافہ ہوگا۔

صدر ایف پی سی سی آئی نے مزید کہا کہ شرح سود میں کمی سے حکومتی اندرونی قرضوں میں بھی بڑی کمی ہوگی، حکومت کی جانب سے آئی پی پیز سے معاہدوں کی منسوخی بھی اہم قدم ہے۔

دوسری جانب ایف پی سی سی آئی کے سینئر نائب صدر ثاقب فیاض مگوں کا کہنا تھا کہ پالیسی ریٹ کو سنگل ڈیجٹ کرنے سے معاشی ترقی اور کاروباری سرگرمیاں بڑھیں گیں۔

سینئر نائب صدر کہتے ہیں کہ کاروباری سرگرمیوں میں اضافے سے برآمدات میں اضافہ ہوگا جب کہ بزنس کمیونٹی معاشی بہتری کے لئے کئے گئے تمام حکومتی فیصلوں کی مکمل حمایت کرے گی۔