وفاقی وزیر مذہبی امور و بین المذاہب ہم آہنگی اور سمندر پار پاکستانی چوہدری سالک حسین نے کہا کہ پاکستان میں اقلیتوں کو تمام سیاسی، معاشی اور سماجی حقوق حاصل ہیں جن کی آئین نے ضمانت دی ہے۔

وفاقی وزیر مذہبی امور و بین المذاہب ہم آہنگی اور سمندر پار پاکستانی چوہدری سالک حسین سے آسٹریلین ہائی کمشنر نیل ہاکنز نے ملاقات کی۔

ملاقات کے دوران دنیا میں مذہبی عدم برداشت، دہشتگردی اور بین المذاہب ہم آہنگی کے فروغ کے حوالے سے مختلف تجاویز پر تبادلہ خیال کیا گیا۔

ملاقات میں وفاقی وزیر چوہدری سالک حسین کہا کہ ملک میں بین المذاہب ہم آہنگی کا فروغ، سمندر پار پاکستانیوں کے مسائل کا حل ترجیحات میں شامل ہے، پاکستان میں وزارت تعلیم کے ماتحت 18 ہزار سے زائد مدارس کو رجسٹر کیا گیا ہے، مدارس کے طلبا کو جدید تکنیکی تعلیم فراہم کرنا وقت کی اہم ضرورت ہے۔

دوسری جانب آسٹریلین ہائی کمشنر نیل ہاکنز نے کہا کہ آسٹریلیا مدارس کے طلبا کو جدید تکنیکی تعلیم دینے کیلئے پاکستان کی معاونت کیلئے تیار ہے، نفرت اور عدم برداشت دو بنیادی عوامل ہیں جو تشدد اور انتہا پسندی کو فروغ دیتے ہیں۔

آسٹریلین ہائی کمشنر نے یہ بھی کہا کہ بین المذاہب ہم آہنگی کا فروغ معاشرے میں محبت ، مساوات، رواداری اور برادشت جیسے جذبات کو فروغ دے کر ہی ممکن ہے، جبکہ انہوں نے یونان کشتی میں پاکستانیوں کی ہلاکت پر افسوس کا اظہارکیا۔

آسٹریلین ہائی کمشنر نے مزید یہ بھی کہا کہ ہنر مند پاکستانیوں کو آسٹریلیا میں روزگار کے مزید مواقع فراہم کرنے کیلئے پر عزم ہیں۔

چوہدری سالک حسین نے اس موقع پر کہا کہ غیر قانونی انسانی اسمگلنگ کی روک تھام کے لیے حکومت پاکستان مزید مؤثر اقدامات کر رہی ہے، جبکہ پاکستان نے روزگار کیلئے بیرون ملک جانے والے افراد کو جدید ہنر سکھانے کیلئے پروجیکٹ کا آغاز کیا ہے۔

ملاقات میں انتہا پسندی و شدت پسندی کے خاتمے، بین المذاہب ہم آہنگی کے فروغ کیلئے دونوں ممالک کے درمیان تعاون بڑھانے پر اتفاق کیا گیا۔