صدر آرٹس کونسل پاکستان محمد احمد شاہ نے کہا کہ جشن کراچی عالمی اردو کانفرنس کا انعقاد 5 دسمبر سے ہوگا۔

آرٹس کونسل آف پاکستان کراچی کے زیر اہتمام چار روزہ ”سترھویں عالمی اردو کانفرنس 2024“ کے حوالے سے  پریس کانفرنس ہوئی۔

کانفرنس میں صدر آرٹس کونسل محمد احمد شاہ، معروف دانشور و مزاح نگار انور مقصود شریک ہوئے، جبکہ معروف شاعر افتخار عارف، نورالہدیٰ شاہ اور اعجاز فاروقی نے پریس بریفنگ دی۔

بریفنگ میں بتایا گیا کہ سترھویں عالمی اردو کانفرنس میں اس سال ”جشن کراچی“ منا یا جارہا ہے، جبکہ آرٹس کونسل آف پاکستان کراچی کی 70ویں سالگرہ کے موقع پر کیک بھی کاٹا جائے گا۔

  جشن کراچی سترھویں عالمی اردو کانفرنس کے پہلے روز افتتاحی اجلاس کے بعد میں ہوں کراچی، میں انور مقصود پر سیشن ہوگا، جس میں تابش ہاشمی اور وسیم بادامی بھی شامل ہوں گے۔ دوسرے روز کا آغاز اردو نظم میں کراچی کا حصہ سے کیا جائے گا، جس کے بعد تقدیسی ادب کے روشن چراغ، دنیا بدلتی خواتین، کتابوں کی رونمائی، کے ایم سی 1843 سے 2024ءتک، بچوں کا ادب،و دیگر سیشنز ہوں گے۔

صدر آرٹس کونسل پاکستان محمد احمد شاہ نے پریس کانفرنس کے دوران کہا کہ کراچی میں پھر ایک بڑا گلدستہ سجنے کو تیار ہیں عالمی اردو کانفرنس 8 دسمبر تک وائی ایم سی گراؤنڈ اور آرٹس کونسل میں منعقد ہوگی۔

صدر آرٹس کونسل کے مطابق اس کانفرنس میں اردو زبان کے مختلف سیشنز منعقد ہوں گے، جبکہ ہم نوجوانوں کو مزید اردو زبان کی اہمیت سے متعلق آگاہی فراہم کرنے کے لیے کوشاں ہیں۔