وزیر اعلیٰ پنجاب مریم نواز شریف نے چین کی طرز پر لاہور میں فضائی آلودگی اور مٹی دھول سے نجات کا جدید طریقہ لاگو کرنے کا فیصلہ کرلیا۔

وزیر اعلیٰ مریم نواز کی جانب سے لاہور میں 1500 تعمیراتی مقامات پر پانی کے چھڑکاؤ کا نظام نصب کرنے کا حکم دیا گیا ہے۔

یہ مقامی طور پر تیار کردہ ٹیکنالوجی ہے جس پر گزشتہ تین ہفتے سے تجربات جاری تھے، ماحولیاتی تحفظ کا ادارہ (ای پی اے) نے تجربات کی کامیابی کے بعد اب اسے عملی طور پر لاگو کرنے کا فیصلہ کیا۔

وزیراعلیٰ پنجاب نے ‘سی اینڈ ڈبلیو’ اور ‘ایل ڈی اے’ کو فوری ‘واٹر سپرنکل سسٹم’ لگانے کی بھی ہدایت دی اور 15 جنوری تک قذافی اسٹیڈیم میں واٹر سپرنکل سسٹم کی تنصیب کا بھی حکم دے دیا۔

پانی کو فوارے کے انداز میں اس طرح چلایا جاتا ہے جس سے تعمیراتی مقام پر مٹی نہ اڑے اور گردو غبار پیدا نہ ہو، تعمیراتی مقامات کو سبز کپڑے سے ڈھانپنا لازمی ہوگا تاکہ تعمیراتی کام کے دوران سیمنٹ، مٹی اور دھول نہ اڑے جبکہ  10 فروری کے بعد پانی کے چھڑکاؤ کے طریقہ کار پر عمل نہ کرنے پر مقدمہ درج ہوگا۔

اس حوالے سے سینیٹر وزیر مریم اورنگزیب نے اپنے بیان میں کہا کہ ‘واٹر سپرنکلرز اور مسٹ’ کے اس طریقہ کار سے اسموگ کے خاتمے کے مشن میں مزید تیزی اور بہتری آئے گی، ماحولیاتی تحفظ کا ادارہ (ای پی اے) 9 ماہ سے فضائی آلودگی کے خاتمے کی جنگ لڑ رہا ہے۔

انہوں نے مزید کہا کہ ماحولیاتی بہتری کے لئے رویوں کی تبدیلی، ہر شہری کا تعاون، جدید مشینری اور طریقوں کا استعمال ضروری ہے۔