شہر قائد میں بچوں کے مبینہ اغواء کے واقعات میں مسلسل اضافہ دیکھنے میں آرہا ہے۔ نارتھ کراچی میں 7 سالہ صارم کے بعد گارڈن حسن لشکری کے علاقے سے دو مزید بچوں کے اغواء کا واقعہ سامنے آیا ہے۔

تفصیلات کے مطابق گارڈن حسن لشکری کے ایک ہی محلے سے 4 سالہ علیان اور 6 سالہ علی رضا گزشتہ 24 گھنٹوں سے لاپتہ ہیں۔ دونوں بچے ایک دوسرے کے پڑوسی تھے اور گھر کے باہر کھیل رہے تھے جب اچانک غائب ہوگئے۔

علیان کے کزن کا کہنا ہے کہ وہ بہن بھائیوں میں سب سے چھوٹا تھا اور مدرسے سے آ کر باہر کھیل رہا تھا۔ علیان کی بہن نے روتے ہوئے کہا، علیان میرا لاڈلہ تھا، مجھے وہ چاہیے۔

دوسری جانب، 6 سالہ علی رضا کے والد نے میڈیا سے گفتگو کرتے ہوئے کہا کہ علی گھر میں سب سے بڑا تھا اور اسکول سے واپسی کے بعد کھیلنے کے لیے باہر گیا تھا۔ انہوں نے کہا، “ہم غریب لوگ ہیں، ہماری کسی سے دشمنی نہیں، ہمارے بچے ہمیں واپس دلوائے جائیں۔

گارڈن پولیس نے بچوں کے والدین کی مدعیت میں مقدمہ درج کر لیا ہے اور تفتیش جاری ہے، تاہم 24 گھنٹے گزرنے کے باوجود بچوں کا کوئی سراغ نہیں ملا۔

ایک ہفتے کے دوران دو مختلف واقعات میں تین بچوں کے مبینہ اغواء نے والدین میں شدید خوف و ہراس پیدا کر دیا ہے۔

متاثرہ والدین نے سندھ حکومت، آئی جی سندھ اور دیگر اعلیٰ حکام سے اپیل کی ہے کہ وہ معاملے کا فوری نوٹس لیں اور ان کے بچوں کو بحفاظت بازیاب کرائیں۔