کراچی: گورنر سندھ کامران ٹیسوری نے شہر قائد میں ولادت حضرت علیؓ کی مناسبت سے تقریب میں کہا کہ آرمی چیف ملکی ترقی اور سرحدی حفاظت کے لیے کوشاں ہیں۔

گورنر سندھ کامران ٹیسوری نے شہر قائد میں ولادت حضرت علیؓ کی مناسبت سے تقریب میں شرکت کی جس دوران تقریب سے خطاب میں انہوں نے کہا کہ نوجوانوں کو آئی ٹی کی تربیت فراہم کر رہے ہیں اور نوجوانوں کو روزگار کی فراہمی ترجیح ہے۔

گورنر سندھ کامران ٹیسوری نے بتایا کہ گورنر ہاؤس میں 50 ہزار بچے زیرِ تعلیم ہیں اور آئی ٹی کلاسز کو 10 مہینے مکمل ہوگئے ہیں جب کہ گورنر آئی ٹی انیشی ایٹو کے تحت پہلا بیچ آخری مراحل میں داخل ہوچکا اور عنقریب آئی ٹی طلبا و طالبات گورنر ہاؤس سے فارغ التحصیل ہوجائیں گے۔

کامران ٹیسوری کا کہنا ہے کہ گورنر ہاؤس کے دروازے ہم نے 24 گھنٹے کھول رکھے ہیں، کوئی جو مجبور ہو اور یامایوسی کی طرف جارہا ہو تو وہ گورنرہاؤس آجائے جب کہ کوئی بھی شہری کسی بھی وقت گورنر ہاؤس اپنے مسائل لے کر آسکتا ہے۔

ان کا کہنا تھا کہ ہماری ٹیم 24 گھنٹے دستیاب ہے اور جو کوئی کچھ بھی کہے عوام جانتی ہے میں نے 2 سال میں کیا کیا۔ ہمیں ہم آہنگی کے کردار ادا کرنے ہیں اور آج میں جعفرطیار میں منعقد تقریب میں بھی شرکت کروں گا۔

گورنر سندھ کہتے ہیں کہ آرمی چیف ملکی ترقی کے لیے کوشاں ہیں اور سرحدی حفاظت کے لیے بھی ہمارے آرمی چیف کوشاں ہیں جب کہ وزیراعظم ملکی بہتری کے لیے دن رات محنت کر رہے ہیں۔

انہوں نے مزید کہا کہ گٹر کے ڈھکن سے متعلق میئر کراچی مرتضیٰ وہاب سے تفصیلی گفتگو ہوئی جس دوران میئر نے بتایا کہ گٹر کے ڈھکن نشے کے عادی افراد نکال کر لے جاتے ہیں اور جو شہر کی ترقی کے لئے کام کرے گا میں اس کے ساتھ کھڑا ہوں۔