پیپلز پارٹی کے چیئرمین بلاول بھٹو زرداری نے کہا ہے کہ ہم سب مل کر 2025 کو پاکستان کے لیے ترقی اور امید کا سال بنائیں گے۔

پی پی پی چیئرمین بلاول بھٹو نے نئے سال کے آغاز کے موقع تمام اہل وطن اور عالمی برادری کو نئے سال کی مبارکباد دی اور اپنے پیغام میں کہا کہ آنے والا نیا سال اتحاد، ترقی اور خوشحالی کا سال ہوگا۔

انہوں نے کہا کہ سال 2025 میں داخل ہوتے ہوئے، ہمیں اپنی جدوجہد کا جائزہ لینا اور کامیابیوں کا جشن منانا چاہیے، ہمیں آج ایک ایسے پاکستان کی تعمیر کے لیے اپنے عزم کو تازہ کرنا چاہیے جو  بانی قائدین کے خوابوں کا آئینہ دار ہو۔

بلاول بھٹو نے کہا کہ یہ وقت ہے کہ ہم اپنے تعلقات کو مضبوط کریں اور اختلافات کو بُھلا کر آگے بڑھیں، یہ وہ وقت ہے کہ ہم انصاف، مساوات اور امن کے لیے مل کر کام کریں۔

انکا کہنا تھا کہ ہمیں ملک سے غربت، عدم مساوات اور جہالت کے خلاف جدوجہد جاری رکھنا ہوگی، قوم کو ایک ترقی پسند اور جامع پاکستان کی جستجو میں متحد رہنے کی ضرورت ہے۔

پی پی چیئرمین نے کہا کہ مجھے پاکستانی عوام کی طاقت اور حوصلے پر کامل یقین ہے، ہم چیلنجز پر قابو پا کر ایک ایسے مستقبل کا راستہ ہموار کریں گے جو امید اور ہم آہنگی سے بھرا ہوگا۔

انہوں نے کہا کہ عوام کے حقوق کے تحفظ اور ان کی فلاح و بہبود کے لیے  پیپلز پارٹی اپنے غیر متزلزل عزم کے ساتھ کھڑی ہے، آئیے! نیا سال جمہوریت، آزادی اور سماجی انصاف کے اصولوں کے لیے ہماری وابستگی کی تجدید کریں، دعاگو ہوں کہ 2025 تمام پاکستانیوں کے لیے امن، صحت اور خوشحالی سے بھرپور سال ثابت ہو۔

بلاول بھٹو نے مزید کہا کہ شہری ایک دوسرے کا ساتھ دینے اور بہتر کل کے لیے کوششیں جاری رکھیں، ہم سب مل کر 2025 کو پاکستان کے لیے ترقی اور امید کا سال بنائیں گے۔