اسلا آباد: وزیر خزانہ محمد اورنگزیب نے ورلڈ اکنامک فورم کے موقع پر کہا کہ پاکستان اور چین کے درمیان سرسبز و طویل مدتی شراکت داری قائم ہے۔

وزیر خزانہ سینیٹر محمد اورنگزیب نے ورلڈ اکنامک فورم کے موقع پر چائنا گلوبل ٹیلی ویژن نیٹ ورک (سی جی ٹی این) ٹیلی ویژن سے گفتگو کی۔

دوران گفتگو انہوں نے کہا کہ چین نے اے آئی اور ٹیکنالوجی، مالی امداد کی فراہمی کے ساتھ پاکستان میں سرمایہ کاری اور ٹیکنالوجی سمیت علوم کی منتقلی میں ہمیشہ پاکستان کا ساتھ نبھایا ہے۔

وزیر خزانہ کا کہنا ہے کہ ہم نے پر خیال چینی قیادت سے ہمیشہ سیکھا ہے، سی پیک کے دوسرے فیز میں باہمی کاروباری شراکتوں کے کے ثمرات نمایاں ہوں گے۔

محمد اورنگزیب کہتے ہیں کہ سی پیک فیز ٹو میں چینی صنعتوں کی پاکستان منتقلی کے امکانات پر توجہ ہوگی اور پاکستان کو چینی صنعتوں کے لیے برآمدی مرکز بنانے کی کوشش ہوگی۔

ان کا کہنا تھا کہ ہماری کوشش ہے کہ اسی سال پانڈا بانڈ کا اجرا ہوجائے، ہم دنیا کی سب سے بڑی اور گہری چینی کیپٹل مارکیٹ تک رسائی کے لیے کوشاں ہیں۔

انہوں نے سی جی ٹی این ٹیلی ویژن سے گفتگو میں یہ بھی کہا کہ پہلے ایف ڈی آئی ڈیجیٹل انشی ایٹو کا پاکستان کے لیے اجرا ہمارے لیے اعزاز کی بات ہے اور ہم دوسروں کے تجربات سے سیکھ کر پاکستان کے آئی ٹی شعبے کو آگے لے جانے کے خواہاں ہیں۔

وزیر خزانہ کا مزید کہنا تھا کہ ڈیجیٹل انفراسٹرکچر کی کامیاب منتقلی، اسپیشل ٹیکنالوجی زونز کے قیام، فِن ٹیک مواقع اور اے آئی ڈیٹا سینٹرز کے لیے یہ اہم پیش رفت ہے جب کہ پاکستان میں فری لانسرز کی دنیا کی تیسری سب سے بڑی آبادی موجود ہے۔