وزیر اعلیٰ بلوچستان میر سرفراز احمد بگٹی نے پاکستان کے مقامی الیکٹرو آپٹیکل سیٹلائٹ (EO-1) کی کامیاب لانچنگ پر پوری قوم کو مبارکباد پیش کی ہے۔

انہوں نے اس کامیابی کو ملک کی سائنسی و تکنیکی ترقی میں ایک تاریخی سنگ میل قرار دیا۔

وزیر اعلیٰ بلوچستان نے اپنے بیان میں کہا کہ EO-1 سیٹلائٹ کی لانچنگ پاکستان کے لیے ایک نئے دور کا آغاز ہے، جو قومی ترقی کے لیے نئے دروازے کھولے گا۔

انہوں نے کہا کہ اس جدید ٹیکنالوجی سے بلوچستان سمیت ملک بھر کے زرعی شعبے کو نمایاں فوائد حاصل ہوں گے، جس سے فصلوں کی مانیٹرنگ، پانی کے وسائل کے انتظام اور ماحولیاتی تجزیے میں مدد ملے گی۔

میر سرفراز احمد بگٹی نے کہا کہ یہ کامیابی پاکستان کے سائنس دانوں، انجینئرز اور قومی اداروں کی انتھک محنت کا نتیجہ ہے، جنہوں نے شب و روز کی کاوشوں سے ملک کو خلائی ٹیکنالوجی میں ایک اہم مقام دلانے میں مدد دی ہے۔

انہوں نے مزید کہا کہ بلوچستان حکومت اس کامیابی سے بھرپور استفادہ کرتے ہوئے صوبے کی ترقی اور عوامی بہبود کے منصوبوں میں جدید ٹیکنالوجی کو شامل کرے گی۔

وزیر اعلیٰ بلوچستان نے کہا کہ قوم کو اس عظیم کامیابی پر فخر کرنا چاہیے، کیونکہ یہ پاکستان کے خود انحصاری اور ٹیکنالوجی کے میدان میں پیش رفت کی علامت ہے۔

انہوں نے امید ظاہر کی کہ مستقبل میں مزید سائنسی کامیابیاں ملک کی ترقی میں معاون ثابت ہوں گی۔