پی ٹی آئی کے سینئر رہنما عمر ایوب نے کہا ہے کہ 190 ملین پاؤنڈ ریفرنس کا فیصلہ صرف بانی پی ٹی آئی کو ٹارگٹ کرنے کیلئے ہے۔

احتساب عدالت کے فیصلے کے بعد اپوزیشن لیڈر عمر ایوب اور دیگر پی ٹی آئی رہنماؤں نے پریس کانفرنس کرتے ہوئے کہا کہ پاکستان کی عدالتی تاریخ میں آج ایک سیاہ دن ہے۔

عمر ایوب نے کہا کہ پاکستان کی جوڈیشل تاریخ میں سیاہ دن ہے، بانی پی ٹی آئی اور بشریٰ بی بی کے خلاف 190 ملین پاؤنڈ ریفرنس کا فیصلہ سنایا گیا، یہ فیصلہ صرف بانی پی ٹی آئی کوٹارگٹ کرنے کے لیے ہے۔

انہوں نے کہا کہ بشریٰ بی بی اور بانی پی ٹی آئی کا اس پیسے سے کیا تعلق ہے، وہ پیسہ پاکستان کے سپریم کورٹ میں آیا ہے، سوال تو حسن نواز سے پوچھنا چاہیے تھا کہ وہ یہ پیسہ باہر کیسے لے گئے۔

’’ہم اس فیصلے کو سپیریئر کورٹ میں چیلنج کریں گے‘‘

دوسری جانب پی ٹی آئی رہنما شبلی فراز نے کہا کہ ہم اس فیصلے کو سپیریئر کورٹ میں چیلنج کریں گے، اس کیس میں جو چور ہیں وہ باہر پھر رہے ہیں، ماضی کے فیصلوں کی طرح اس فیصلے کو بھی کالعدم قرار دیا جائے گا۔

انہوں نے کہا کہ ایک شخص، نمل یونیورسٹی اور شوکت خانم جیسے ادارے بناتا ہے، پھر ایک ایسی یونیورسٹی بنائی جس میں بنی پاک کی سیرت پڑھائی جانی تھی،اس میں سزا دینا ظلم اور زیادتی ہے۔

شبلی فراز نے مزید کہا کہ عدالت نے بانی کے خلاف فیصلوں کو باہر پھینک دیا، اس کو بھی عدالت ختم کردے گی۔