لاہور: چیمپئنز ٹرافی کے لیے پاکستانی اسکواڈ کو حتمی شکل دینے کے لیے مشاورت جاری ہے۔

  ذرائع کے مطابق صائم ایوب  کی شمولیت کا فیصلہ میڈیکل رپورٹس کی بنیاد پر کیا جائے گا، جبکہ صائم ایوب کے فٹ نہ ہونے کی صورت  میں سلیکٹرز نے متبادل کا فیصلہ کرلیا ہے۔

 ذرائع نے بتایا کہ چیمپئنز ٹرافی سے قبل پاکستانی ٹیم کو سہہ فریقی  سیریز میں حصہ لینا ہے، جبکہ سہہ فریقی سیریز کی ٹیم ہی چیمپئنز ٹرافی کے لیے ٹیم ہو گی۔

 ذرائع کے مطابق آوٹ آف فارم عبداللہ شفیق اورعثمان خان کے ڈراپ ہونے کا  امکان ہے، جبکہ فخر زمان کی اسکواڈ میں شمولیت یقینی ہے، اس کے علاوہ  امام الحق اور حسیب اللہ کے ناموں پر بھی غور کیا جارہا ہے۔

ذرائع  نے بتایا کہ محمد رضوان ہی چیمپئنز ٹرافی میں پاکستان کی قیادت کریں گے، اس کے علاوہ  بابر اعظم، سلمان آغا، طیب طاہر اور عرفان خان اسکواڈ میں شامل ہیں۔

  ذرائع کے مطابق محمد حسنین، نسیم شاہ، شاہین آفریدی حارث روف  کو  اسکواڈ میں شامل کیا گیا ہے جبکہ کامران غلام ، ابرار  احمد اور صفیان مقیم کی بھی اسکواڈ  کا حصہ ہوں گے۔

 ذرائع  نے بتایا کہ پاکستان  کے علاوہ چیمپئنز ٹرافی کی تمام ٹیموں نے اسکواڈز کا اعلان کر دیا ہے،  جبکہ پاکستان آئی سی سی کو ابتدائی اسکواڈ کے نام بھجوا چکا ہے۔

 ذرائع کے مطابق چیمپئنز ٹرافی کے لیے11 فروری تک حتمی اسکواڈ کا لازمی اعلان کرنا ہے، واضح رہے کہ سہہ فریقی سیریز کا پہلا میچ 8 فروری کو ہو گا۔