قومی اسمبلی کی رکن شرمیلا فاروقی نے ’جہیز کی ممانعت کا بل 2025‘ پیش کر دیا۔

بل کے تحت ملک میں جہیز کے لین دین پر مکمل پابندی عائد کرنے اور خلاف ورزی کی صورت میں سخت سزاؤں کا تعین کیا گیا ہے۔

بل کے مطابق، جہیز کی لین دین میں ملوث افراد کو پانچ سال قید اور کم از کم اڑھائی لاکھ روپے جرمانے کی سزا دی جائے گی۔

علاوہ ازیں، خلاف ورزی کرنے والے شخص پر جہیز کی مالیت کے مساوی رقم بطور جرمانہ بھی عائد کی جائے گی۔

جہیز کا بلا واسطہ یا بلواسطہ مطالبہ کرنے والے شخص کو دو سال قید اور اڑھائی لاکھ روپے تک جرمانے کی سزا دی جائے گی، جس میں مزید توسیع بھی ممکن ہوگی۔

شادی کی تشہیر میں جائیداد کی پیشکش کو جرم قرار دیا جائے گا، اور ایسا کرنے والے شخص کو دو سال قید اور ایک لاکھ روپے جرمانہ ادا کرنا ہوگا۔

جہیز کسی اور فرد کو دینے کے بجائے صرف دلہن کی ملکیت میں شمار ہوگا، اور اگر کسی شخص نے جہیز یا جائیداد دلہن کو منتقل نہ کی تو اسے تین سال قید کی سزا دی جا سکتی ہے۔

ایکٹ کے تحت بارِ ثبوت ملزم پر ہوگا، یعنی ملزم کو یہ ثابت کرنا ہوگا کہ اس نے قانون کی خلاف ورزی نہیں کی۔

بل کے تحت وفاقی حکومت کو امتناعِ جہیز افسران تعینات کرنے کا اختیار دیا گیا ہے، جبکہ ان افسران کے ساتھ تعاون کے لیے ایڈوائزری بورڈ کی تشکیل بھی تجویز کی گئی ہے۔

اس بورڈ میں متعلقہ علاقے کے پانچ سماجی بہبود ورکرز، بشمول تین خواتین شامل ہوں گی۔

بل کے نفاذ کے بعد 1976 کے “جہیز و تحائف پابندی ایکٹ” کو منسوخ تصور کیا جائے گا، اور نیا قانون اس کی جگہ لے گا۔