سیالکوٹ میں سمبڑیال کے نواحی گاؤں بکھڑے والی میں اوورسیز پاکستانی کی شادی کے موقع پر ملکی و غیر ملکی کرنسی کی برسات کر دی گئی، بارات کے راستے اور شادی ہال میں لاکھوں روپے نچھاور کیے گئے۔

اٹلی میں مقیم دولہا عمران کی بارات جب گاؤں بکھڑے والی سے نکلی تو دولہے کے بھائیوں اور دوستوں نے راستے میں نوٹ نچھاور کرنے کا سلسلہ شروع کر دیا۔

بارات کے سمبڑیال کے ایک مقامی شادی ہال پہنچنے پر یہ سلسلہ اور بھی شدت اختیار کر گیا، جہاں ملکی و غیر ملکی کرنسی کی برسات کر دی گئی۔

تقریب میں نوٹ لٹانے کے لیے ایک خصوصی کنٹینر رکھا گیا تھا، جہاں شادی میں شریک مہمانوں اور مقامی افراد نے بڑی تعداد میں جمع ہو کر کرنسی لوٹی۔

اس موقع پر مختلف علاقوں سے نوجوان بھی جوق در جوق پہنچے، تاکہ نوٹ سمیٹنے میں حصہ لے سکیں۔

دولہے کے اسپین اور کینیڈا سے آئے بھائیوں، منصور اور احتشام، نے بتایا کہ انہوں نے اپنے بھائی کی شادی پر 50 لاکھ سے زائد کی ملکی و غیر ملکی کرنسی نچھاور کی۔ ان کا کہنا تھا کہ یہ ان کے گاؤں کی روایت ہے کہ شادیوں پر نوٹوں کی برسات کی جاتی ہے۔

واضح رہے کہ بکھڑے والی کو اوورسیز پاکستانیوں کا گاؤں کہا جاتا ہے، جہاں شادیوں کے مواقع پر ایک دوسرے سے بڑھ کر نوٹ لوٹانے کا رواج پایا جاتا ہے۔

شادی کی اس تقریب میں بھی نوٹ نچھاور کرنے کے مناظر دیکھنے والے تھے، جہاں دولہے کے دوستوں اور اہلخانہ نے اپنی خوشی کے اظہار کے لیے دل کھول کر کرنسی لٹائی۔

یہ تقریب سوشل میڈیا پر بھی زیر بحث رہی، جہاں صارفین نے اسے خوشی کا اظہار قرار دیتے ہوئے مختلف تبصرے کیے۔