سندھ کابینہ کی سب کمیٹی کا سندھ سیڈ کارپوریشن کی کارکردگی کا جائزہ لینے سے متعلق اہم اجلاس وزیر زراعت سردار محمد بخش مہر کی صدارت میں منعقد ہوا۔

اجلاس میں صوبائی وزرا جام خان شورو، سید ذوالفقار علی شاہ، سیکریٹری زراعت، ایم ڈی سندھ سیڈ کارپوریشن سمیت دیگر متعلقہ افسران نے شرکت کی۔

اجلاس میں سندھ سیڈ کارپوریشن کی موجودہ کارکردگی، مستقبل کے منصوبوں اور کاشتکاروں کو مزید بہتر سہولیات فراہم کرنے کے حوالے سے تفصیلی بریفنگ دی گئی۔

ایم ڈی سندھ سیڈ کارپوریشن نے گزشتہ اجلاسوں میں کیے گئے فیصلوں پر عملدرآمد سے متعلق رپورٹ پیش کی۔

کابینہ کی سب کمیٹی نے کارپوریشن میں تین مزید زرعی ماہرین کی شمولیت کی ہدایت دیتے ہوئے کہا کہ زرعی ماہرین کی موجودگی سے بیجوں کے معیار اور زرعی پیداوار میں بہتری آئے گی۔

کمیٹی نے مزید قانونی اصلاحات کی ضرورت پر زور دیتے ہوئے ایم ڈی سندھ سیڈ کارپوریشن کو ہدایت کی کہ آئندہ اجلاس میں اصلاحاتی تجاویز پر مبنی رپورٹ پیش کی جائے۔

اجلاس میں بریفنگ دیتے ہوئے ایم ڈی سندھ سیڈ کارپوریشن نے بتایا کہ صوبے میں 2,300 ایکڑ رقبے پر مختلف زرعی اقسام کے بیج لگائے گئے ہیں جبکہ 500 رجسٹرڈ ہاریوں کو زرعی اجناس فراہم کی جا چکی ہیں۔

وزیر زراعت سردار محمد بخش مہر نے بیجوں کے معیار کو یقینی بنانے کے لیے سخت معیاری کنٹرول نظام نافذ کرنے کی ہدایت دی، جبکہ صوبائی وزیر جام خان شورو نے کہا کہ سندھ سیڈ کارپوریشن کی تشکیل کا مقصد کاشتکاروں کو معیاری بیج فراہم کرنا اور زرعی پیداوار میں اضافہ کرنا ہے۔

صوبائی وزیر سید ذوالفقار علی شاہ نے کارپوریشن کی مزید بہتری پر زور دیتے ہوئے کہا کہ زرعی شعبے کی ترقی کے لیے اس ادارے کو جدید خطوط پر استوار کرنے کی ضرورت ہے۔

 اجلاس کے اختتام پر تمام متعلقہ اداروں کو زرعی اصلاحات اور بہتری کے لیے عملی اقدامات کرنے کی ہدایات جاری کی گئیں۔