راولپنڈی: پاکستان اور بنگلادیش نے مشترکہ تربیتی منصوبوں کے ذریعے فضائی افواج کے تعاون کو مزید مضبوط بنانے پر اتفاق کیا ہے۔

پاک فوج کے شعبہ تعلقات عامہ (آئی ایس پی آر) کے مطابق بنگلادیشی دفاعی وفد نے پاک فضائیہ کے سربراہ ایئر چیف مارشل ظہیر احمد بابر سدھو سے ایئرہیڈکوارٹر اسلام آباد میں ملاقات کی۔

آئی ایس پی آر نے بتایا کہ بنگلادیشی وفد نے پاکستان کے جدید دفاعی منصوبوں اور ٹیکنالوجی کی تعریف کی جب کہ ملاقات میں مشترکہ تربیتی منصوبوں کے ذریعے فضائی افواج کے تعاون کو مزید مضبوط بنانے پر اتفاق کیا گیا۔

ترجمان پاک فوج کا کہنا ہے کہ بنگلادیش کے وفد نے جے ایف-17 تھنڈر طیاروں میں گہری دلچسپی کا اظہار کیا جب کہ پاک فضائیہ اور بنگلادیشی مسلح افواج کے درمیان دفاعی شراکت داری کو فروغ دینے کا عزم کیا گیا۔

پاک فوج کے شعبہ تعلقات عامہ کا کہنا تھا کہ دونوں ممالک کے درمیان دفاعی تعلقات کو مزید وسعت دینے پر بھی بات چیت کی گئی۔

آئی ایس پی آر نے یہ بھی بتایا کہ دوران ملاقات بنگلادیشی وفد نے کہا کہ جدید دفاعی ٹیکنالوجی میں پاکستان کی ترقی قابلِ ستائش ہے۔

ترجمان پاک فوج کا کہنا تھا کہ پاکستان اور بنگلادیش کے درمیان مشترکہ منصوبوں اور تربیتی پروگرامز میں تعاون بڑھانے پر اتفاق کیا گیا ہے۔

آئی ایس پی آر نے مزید کہا کہ پاک فضائیہ کی قیادت میں جدید منصوبوں کو عالمی سطح پر پذیرائی حاصل ہو رہی ہے۔