صدرآصف علی زرداری اور وزیراعظم شہبازشریف نے بریل کے عالمی دن پر خصوصی پیغام جاری کئے ہیں۔

صدر ِمملکت آصف علی زرداری

صدر ِمملکت آصف علی زرداری نے بریل  رسم الخط  کے عالمی دن کے موقع پر پیغام دیتے ہوئے کہا کہ بینائی سے محروم افراد کی علم تک رسائی کی اہمیت اجاگر کرنے کیلئے بریل رسم الخط کا دن منا رہے ہیں۔

 صدرمملکت نے کہا کہ بریل رسم الخط کا عالمی دن منانے کا مقصد بینائی سے محروم افراد کے حقوق بارے آگاہی پیدا کرنا ہے، نابینا افراد کی تعلیم اور دیگر سہولیات تک رسائی بہتر بنانے کے عزم کا اعادہ کرتے ہیں۔

آصف علی زرداری نے کہا کہ خصوصی افراد کی سماجی اور معاشی خودمختاری کیلئے علم تک رسائی ناگزیر ہے، بریل رسم الخط بصارت سے محروم افراد کے لیے تعلیم اور معلومات کا اہم ذریعہ ہے۔

انہوں نے یہ بھی کہا کہ نابینا افراد کو بریل رسم الخط میں اہم معلومات کی فراہمی یقینی بنانے کی ضرورت ہے، بینائی سے محروم افراد کو بریل رسم الخط میں کتابوں تک رسائی دینے کیلئے اقدامات تیز کرنا ہوں گے۔

 صدرمملکت نے کہا کہ پاکستان نے نابینا افراد کی علم تک رسائی بڑھانے کیلئے مراکیش معاہدے کی توثیق کی، نابینا افراد کو اعلیٰ معیار کے تعلیمی اور معلوماتی مواد کو بریل رسم الخط میں دستیاب کرنا ہوگا۔

آصف علی زرداری نے مزید کہا کہ ایک ہمہ گیر، انصاف اورمساوات پر مبنی معاشرے کی تشکیل کیلئے معاشرے کے تمام طبقات پر توجہ دینے کی ضرورت ہے، خصوصی افراد کے حقوق کے تحفظ اور فلاح و بہبود کیلئے پرعزم ہیں، معذوری کے حامل افراد کے حقوق کے فروغ کے عزم کا اعادہ کرتے ہیں۔

وزیر اعظم شہباز شریف

وزیر اعظم پاکستان شہباز شریف نے بریل کے عالمی دن پراپنے پیغام میں کہا کہ آج ورلڈ بریل ڈے پر ہم بریل کی لوگوں کو با اختیار بنانے کا اعتراف اور پزیرائی کرنے میں عالمی برادری کے ساتھ شامل ہیں،

 شہباز شریف نے کہا کہ بریل نے دنیا بھر میں لاکھوں بصارت سے محروم افراد کے لیے علم، مواصلات اور آزادی کے دروازے کھولے ہیں، بریل صرف پڑھنے اور لکھنے کا ذریعہ نہیں ہے۔

 وزیر اعظم نے یہ بھی کہا کہ یہ معاشرے میں شمولیت اور مساوی مواقع کی ایک کھڑکی ہے، جو افراد کو آزاد اور باوقار زندگی گزارنے کے لیے با اختیار بناتی ہے، ہم اپنے معاشرے میں ایسے لوگ پیدا کرنے کے اپنے عزم پر قائم ہیں جو قابل رسائی تعلیم کے ذریعے تمام افراد کو با اختیار بنائیں۔

 شہباز شریف نے کہا کہ اسکولوں کو بریل کتابوں سے آراستہ کرنے، اساتذہ کی تربیت میں اضافہ اور بصارت سے محروم طلباء کے لیے خصوصی مراکز قائم کرنے کے عزم پہ قائم ہیں، ورلڈ بریل ڈے اس چیز کی یاد دہانی ہے کہ حقیقی ترقی کا اندازہ اس بات سے لگایا جاتا ہے کہ ہمارا معاشرہ کتنا آزاد اور مساوی ہے۔

وزیر اعظم نے مزید یہ بھی کہا کہ یہ دن ایک ایسا پاکستان بنانے کے ہمارے عہد کو تقویت دینے کا دن ہے جہاں ہر شہری کو پھلنے پھولنے کے پلیٹ فارم اور مواقع میسر ہوں، ہم ہر فرد اور ادارے کے ان اہداف کو پورا کرنے کی جد وجہد  کی پذیرائی کرتے ہیں اور ہر طرح کی مدد فراہم کرنے کا عزم کرتے ہیں۔