بول نیوز کے پروگرام میں ن لیگی اور پی ٹی آئی رہنما کے درمیان ہونے والی لڑائی پر رہنما پاکستان پیپلز پارٹی شہلا رضا نے کہا ہے کہ دونوں سیاسی رہنماؤں کو ذاتیات پر اترنے سے گریز کرنا چاہیے تھا۔

 ان کا کہنا تھا کہ مریم نواز کو نشانہ بنانا پاکستان تحریک انصاف (پی ٹی آئی) کا وطیرہ بن چکا ہے۔ انہوں نے مزید کہا کہ پی ٹی آئی کی قیادت بلاول بھٹو زرداری کو بھی نشانہ بناتی رہی ہے، جو قابل مذمت ہے۔

شہلا رضا نے کہا کہ جب پارٹی قیادت ایسی حرکات کرتی ہے تو کارکنوں کو بھی ایسا کرنے کی ترغیب ملتی ہے۔ ان کے مطابق، سیاسی معاملات میں برے القابات اور ذاتی حوالے دینا افسوسناک عمل ہے اور اس سے سیاسی ماحول میں کشیدگی بڑھتی ہے۔

شہلا رضا نے قومی اسمبلی میں پیش کیے گئے پیکا ترمیمی ایکٹ کا ذکر کرتے ہوئے کہا کہ یہ اقدامات سوشل میڈیا پر جھوٹے اور توہین آمیز رجحانات کے خاتمے کے لیے ضروری ہیں۔

انہوں نے کہا کہ مریم نواز جب منڈی بہاؤالدین گئیں تو ان کے خلاف شرمناک ٹوئٹر ٹرینڈ بنایا گیا، جو سیاسی اقدار کے خلاف ہے۔

 پی ٹی آئی قیادت پر تنقید کرتے ہوئے انہوں نے کہا کہ ان کی سیاسی تربیت کا فقدان واضح ہے اور یہ رویے خواتین کو نشانہ بنانے تک محدود نہیں بلکہ مردوں کے لیے بھی طعنہ زنی تک جا پہنچتے ہیں، جو معاشرتی جھگڑوں کو ہوا دیتا ہے۔

شہلا رضا نے تمام سیاسی جماعتوں سے اپیل کی کہ وہ ذاتی حملوں سے گریز کریں اور سیاست کو تحمل اور اخلاقی اقدار کے دائرے میں رکھیں۔