کراچی: وزیر اعلیٰ سندھ مراد علی شاہ نے وزیر اعظم شہباز شریف کو خط لکھتے ہوئے سڑکوں کی تعمیر پر 4 فیصد رقم مختص کرنے پر احتجاج کیا ہے۔

وزیر اعلیٰ سندھ مراد علی شاہ نے وزیر اعظم شہباز شریف کو خط لکھ دیا ہے جس میں انہوں نے لکھا کہ 6 مارچ 2024 کو وزیراعظم کو خط لکھا کہ حیدرآباد سکھر تک ایم 6 موٹروے تعمیر کیا جائے، حیدرآباد سکھر موٹروے کی تعمیر ملک کی ترقی کے لئے انتہائی اہم ہے۔

انہوں نے لکھا کہ یہ واحد راستہ غائب ہے جو جنوب کو شمال سے ملاتا ہے اس سے پورٹ شہروں کراچی اور گوادر تک ٹریفک کے لئے دشوار ہیں جب کہ یہ بات قابل تشویش ہے کہ نیشنل ہائی وے اتھارٹی نے سندھ کے لئے 5 فیصد سے بھی کم رقم رکھی ہے۔

وزیر اعلیٰ سندھ کا کہنا ہے کہ این ایچ اے نے سالانہ ترقیاتی پروگرام میں سندھ کے ساتھ ناانصافی کی ہے، پنجاب کے 33 منصوبوں پر 38.65 فیصد، سندھ کے 6 منصوبوں پر 4.34 فیصد رقم مختص کی ہے۔

مراد علی شاہ نے بتایا کہ کے پی کے کے 30 منصوبوں کے لئے 17.59 فیصد اور بلوچستان کے 22 منصوبوں پر 23.87 فیصد رقم رکھی گئی ہے۔ گلگت کے 4 منصوبوں پر 4.40 فیصد اور آزاد کشمیر کے ایک منصوبہ پر 0.16 فیصد رقم مختص کی گئی ہے۔

انہوں نے خط میں گذارش کرتے ہوئے یہ بھی لکھا کہ ایک سے زائد صوبوں کے 8 منصوبوں پر 8.50 فیصد، پاکستان سے باہر ایک منصوبہ پر 2.48 فیصد رقم رکھی گئی ہے، گذارش ہے کہ حیدرآباد سکھر تک ایم 6 موٹروے پر بغیر کسی دیر کے بجٹ رکھا جائے۔

ان کا مزید کہنا تھا کہ این ایچ اے کو ہدایات جاری کریں کہ وہ حیدرآباد سکھر ایم 6 موٹروے کا کام شروع کریں اور اس منصوبے کو سالانہ ترقیاتی پروگرام میں شامل کیا جائے۔