اسلام آباد: وفاقی وزیرداخلہ محسن نقوی نے ایف ایٹ جناح ایونیو انٹرچینج اور ایف ٹین راؤنڈ آباؤٹ پراجیکٹس کی جلد تکمیل کے لیے احکامات جاری کردیے۔

وزیرداخلہ محسن نقوی نے ایف ایٹ جناح ایونیو انٹرچینج اور ایف ٹین راؤنڈ آباؤٹ پراجیکٹس کا دورہ کیا اور 42 روز میں انڈر پاس کی تکمیل کے بعد فلائی اوور پراجیکٹ کو بھی ریکارڈ مدت میں مکمل کرنے کا ٹاسک دے دیا۔

محسن نقوی نے جناح ایونیو انٹرچینج فلائی اوور پراجیکٹ پر کام کی رفتار تیز کرنے کی ہدایت دیتے ہوئے کہا کہ فروری کے دوسرے ہفتے تک فلائی اوور کو ٹریفک کیلئے کھول دیا جائے گا، اسپیڈ کے ساتھ معیار کو ہرصورت برقرار رکھا جائے۔

وزیرداخلہ نے دونوں پراجیکٹس کی جلد تکمیل کے لیے احکامات دیے اور کہا کہ تعمیراتی کاموں کے ساتھ پراجیکٹس کے اطراف بیوٹیفکیشن کا کام  جاری رکھا جائے۔

دورے کے دوران وزیرداخلہ محسن نقوی نے ایف ایٹ جناح ایونیو انٹرچینج اور ایف ٹین راؤنڈ آباؤٹ منصوبوں پر جاری تعمیراتی سرگرمیوں کا جائزہ لیا اور دونوں پراجیکٹس پر ہونے والی پیشرفت کا معائنہ بھی کیا۔

وفاقی وزیر داخلہ نے ہدایت دی کہ منصوبوں کے اطراف شجرکاری اور ہارٹیکلچر کے کام کو مقررہ مدت میں مکمل کرنے کیا جائے اور ہر حال میں تعمیراتی کاموں کے اعلیٰ معیار کو یقینی بنایا جائے۔

محسن نقوی نے ایف ٹین راؤنڈ آباؤٹ توسیعی پراجیکٹ پر کام کی رفتار کا بھی جائزہ لیا اور پراجیکٹ کو فروری کے پہلے ہفتے میں مکمل کرنے کا ٹاسک دے دیا۔

اس موقع پر وفاقی وزیر نے گفتگو کرتے ہوئے کہا کہ منصوبوں کی تکمیل سے شہریوں کو ٹریفک جام سے نجات ملے گی، شہریوں کو آمدورفت میں بہت سہولت ملے گی، سگنل فری کوریڈور پر سفر سے وقت اور ایندھن کی بچت ہو گی۔

اس دوران چیئرمین سی ڈی اے محمد علی رندھاوا نے منصوبوں پر پیش رفت پر بریفنگ دی۔

واضح رہے کہ وفاقی سیکریٹری داخلہ خرم علی آغا، نیسپاک کے متعلقہ حکام اور اعلیٰ افسران بھی اس موقع پر موجود تھے۔