وزیر خزانہ محمد اورنگزیب کی زیر صدارت سوشل امپیکٹ فنانسنگ کے حوالے سے ایک اہم اجلاس منعقد ہوا، جس میں سرکاری و نجی شعبے سے تعلق رکھنے والے مختلف اسٹیک ہولڈرز نے شرکت کی۔

اجلاس میں اقتصادی اصلاحات، مالی شمولیت اور سرمایہ کاری کے مواقع پر تفصیلی تبادلہ خیال کیا گیا۔

وزیر خزانہ نے اجلاس کے دوران شرکاء کو ملک کی موجودہ اقتصادی صورتحال، اصلاحاتی ایجنڈے اور درپیش چیلنجز سے آگاہ کیا۔

انہوں نے کہا کہ حکومت معیشت کی بہتری اور پائیدار ترقی کے لیے اصلاحات پر توجہ مرکوز کیے ہوئے ہے، جبکہ قومی سطح پر درپیش مالی و اقتصادی مسائل کے حل کے لیے مؤثر اقدامات کیے جا رہے ہیں۔

اجلاس میں کارانداز پاکستان کی جانب سے عالمی سرمایہ کاری کے رجحانات پر بریفنگ دی گئی، جس کے مطابق عالمی سطح پر سرمایہ کاری کا حجم 1,571 ارب ڈالر تک پہنچ چکا ہے، جبکہ 2019 سے اب تک اس میں سالانہ 21 فیصد کی شرح سے اضافہ ہوا ہے۔

کارانداز نے اجلاس کے دوران گرین امپیکٹ فنڈ کے قیام کی تجویز بھی پیش کی، جس کا مقصد 25 کروڑ روپے کی فنانسنگ کو یقینی بنانا ہے۔ اس فنڈ کے تحت رعایتی قرضے، نقصان کی گارنٹی کے ساتھ ایکویٹی، اور تکنیکی معاونت فراہم کی جائے گی۔

اجلاس میں سماجی تحفظ ڈویژن کی جانب سے غربت کے خاتمے کے لیے کیے جانے والے اقدامات پر بھی بریفنگ دی گئی۔ بے نظیر انکم سپورٹ پروگرام کے تحت ایک جامع مالیاتی فریم ورک ترتیب دیا گیا ہے، جبکہ نشوونما پروگرام کے ذریعے 20 لاکھ خواتین اور دو سال سے کم عمر بچوں کو غذائی تحفظ فراہم کیا جا رہا ہے۔

مزید برآں، اب تک 461 ارب روپے کی رقم 93 لاکھ مستحق خواتین کو منتقل کی جا چکی ہے، جبکہ ڈیڑھ لاکھ سے زائد خاندانوں کو پیداواری اثاثے فراہم کیے گئے ہیں۔

بریفنگ میں یہ بھی بتایا گیا کہ اب تک دو لاکھ 52 ہزار سے زائد افراد کو بلاسود قرضے فراہم کیے گئے ہیں، جبکہ انتہائی غریب اور سیلاب متاثرہ خاندانوں کے لیے گریجویشن پروگرام بھی شروع کیا گیا ہے۔

وزیر خزانہ نے مالی شمولیت کے حقیقی سماجی اثرات کو مؤثر طریقے سے جانچنے کی ضرورت پر زور دیا اور اس مقصد کے لیے ایک جامع ڈیش بورڈ تشکیل دینے کی ہدایت کی۔

انہوں نے مجوزہ مالیاتی فریم ورک کو جلد از جلد حتمی شکل دینے کی ضرورت پر بھی زور دیا تاکہ پائیدار ترقی کے اہداف کو حاصل کیا جا سکے۔