ملتان میں ایل پی جی کی غیر قانونی ری فلنگ کے باعث ہونے والے دھماکے میں زخمی ہونے والے افراد کے علاج کے لیے وزیراعلیٰ پنجاب مریم نواز کی ہدایت پر کمشنر ملتان عامر کریم خان نے برن سنٹر کا دورہ کیا اور زخمیوں کی عیادت کی۔

 کمشنر نے اس موقع پر زخمیوں کو فراہم کی جانے والی طبی سہولتوں کا جائزہ لیا اور علاج میں کسی بھی قسم کی کمی کو پورا کرنے کی ہدایت دی۔

کمشنر ملتان عامر کریم خان نے اس عزم کا اظہار کیا کہ زخمی شہریوں کو علاج معالجے کی بہترین سہولتیں فراہم کی جا رہی ہیں اور اس سلسلے میں کوئی کسر نہیں چھوڑی جائے گی۔

انہوں نے کہا کہ ضلعی انتظامیہ متاثرین کے قیام و طعام کے مکمل انتظامات کرے گی اور عارضی شلٹر بھی فراہم کر دیے گئے ہیں تاکہ متاثرہ خاندانوں کو سہولت مل سکے۔

دھماکے میں تباہ ہونے والے گھروں کے مکینوں کو فوری طور پر عارضی پناہ گاہ فراہم کی گئی ہے، جبکہ ضلعی انتظامیہ نے متاثرین کی مدد کے لیے اقدامات شروع کر دیے ہیں تاکہ ان کی بنیادی ضروریات پوری کی جا سکیں۔

کمشنر ملتان نے اس حادثے کے حوالے سے مزید کہا کہ متاثرین کو مکمل معاونت فراہم کی جائے گی اور اس کی تحقیقات کی جائیں گی تاکہ اس قسم کے واقعات کی روک تھام کی جا سکے۔